आनंद सुब्रमण्यम हेच ते हिमालयातील कथित 'योगी'? सीबीआयने ठोकल्या बेड्या
CBI Arrest Anand Subramanian : एनएसई को-लोकेशन घोटाळ्याप्रकरणी सीबीआयने मोठी कारवाई केली आहे.
CBI Arrest Anand Subramanian : एनएसई को-लोकेशन घोटाळ्याप्रकरणी सीबीआयने मोठी कारवाई केली आहे. नॅशनल स्टॉक एक्सचेंजचे माजी व्यवस्थापकीय संचालक आनंद सुब्रमण्यम यांना केंद्रीय तपास यंत्रणेने गुरुवारी रात्री उशिरा चेन्नई येथून अटक केली. गेल्या तीन दिवसांपासून सीबीआयकडून त्यांची चौकशी सुरू आहे. आनंद सुब्रमण्यम हेच हिमालयातील कथित योगी असल्याची चर्चा आहे. योगी असल्याचे भासवत तेच एनएसईच्या माजी सीईओ चित्रा रामकृष्ण यांना प्रभावित करत असल्याचे बोललं जात आहे.
सेबीच्या म्हणण्यानुसार, आनंद यांची पत्नी सुनीता या 1 एप्रिल 2013 ते 31 मार्च 2014 दरम्यान स्टॉक एक्सचेंजच्या चेन्नई कार्यालयात सल्लागार म्हणून कार्यरत होत्या. त्यावेळी त्यांचा पगार 60 लाख रुपये इतका देण्याचे ठरले होते. त्याच दिवशी आनंद यांची मुख्य धोरणात्मक सल्लागार म्हणून नियुक्ती करण्यात आली आणि त्यांचा पगार 1.68 कोटी रुपये होता. सीबीआय अधिकाऱ्यांनी सांगितलं की, एनएसई को-लोकेशन घोटाळ्याच्या संदर्भात ही अटक करण्यात आली आहे. काही वर्षांपूर्वी झालेल्या या घोटाळ्या प्रकरणी आतापर्यंतची पहिली अटक आहे. गुरुवारी रात्री आनंद सुब्रमण्यम यांना त्यांच्या चेन्नईतील घरातून अटक करण्यात आल्याचे सांगण्यात येत आहे. त्यांना दिल्लीतील सीबीआय मुख्यालयात नेण्यात आलं आहे. लवकरच त्यांना न्यायालयात हजर केले जाईल.
एका ऑडिट रिपोर्टनुसार, सुब्रमण्यम हेच ते रहस्यमय योगी असल्याचे सांगण्यात आले आहे. मात्र सिक्युरिटीज अँड एक्स्चेंज बोर्ड ऑफ इंडिया (SEBI) ने 11 फेब्रुवारी रोजी दिलेल्या अहवालात याचे खंडन केले. 2013 मध्ये एनएसईच्या माजी मुख्य कार्यकारी अधिकारी (CEO) रवी नारायण यांच्यानंतर आलेल्या चित्रा रामकृष्ण यांनी सुब्रमण्यम यांची सल्लागार म्हणून नियुक्ती केली होती. त्यानंतर सुब्रमण्यम यांना 4.21 कोटी रुपयांच्या भरघोस पगारावर एक्सचेंजचे समूहाचे कार्यकारी अधिकारी आणि व्यवस्थापकीय संचालक म्हणून बढती देण्यात आली होती.
रामकृष्ण यांना 3 कोटींचा दंड ठोठावला
या प्रकरणी सेबीने रामकृष्ण यांना 3 कोटी रुपयांचा दंड ठोठावला आहे. याशिवाय सेबीने एनएसईला 2 कोटी रुपये, एनएसईचे माजी व्यवस्थापकीय संचालक - सीईओ रवी नारायण यांना 2 कोटी रुपये आणि मुख्य नियामक अधिकारी आणि अनुपालन अधिकारी व्ही आर नरसिंहन यांना 6 लाख रुपयांचा दंड ठोठावला आहे.
महत्त्वाच्या बातम्या
