एक्स्प्लोर

एटीएममधून 31 डिसेंबरपर्यंत कितीही वेळा पैसे काढा, नो सरचार्ज!

By : एबीपी माझा वेब टीम | Updated at : 10 Nov 2016 08:37 PM (IST)

मुंबई : एक हजार आणि पाचशे रुपयांच्या नोटा चलनातून बाद करण्याचा निर्णय घेतल्यानंतर देशभरातील एटीएम मशिन्स एक दिवसासाठी बंद ठेवण्यात आली. दीर्घकाळासाठी फायदेशीर ठरणारा हा निर्णय घेताना सुरुवातीच्या काळात काही अडचणी किंवा गैरसोयींना सामोरं जावं लागण्याची शक्यता आहे. याचसाठी 31 डिसेंबरपर्यंत कोणत्याही अतिरिक्त शुल्काविना ग्राहकांना एटीएममधून कितीही वेळा पैसे काढता येणार आहेत. तूर्तास एटीएममधून जास्तीत जास्त दोन हजार रुपयांची रक्कमच एका दिवशी काढता येईल. त्यामुळे अनेक जणांना वारंवार एटीएमच्या किंवा बँकेच्या फेऱ्या माराव्या लागण्याची शक्यता आहे. मात्र महिन्याला एटीएममधून मोफत ट्रान्झॅक्शन करण्यावर बंधन असल्यामुळे अनेकांना अतिरिक्त शुल्क द्यावं लागण्याची भीती सतावत होती. परंतु आता ही चिंता दूर झाली आहे.

तुमच्या ATM वरुन किती पैसे काढू शकाल?

तुमचं खातं असलेल्या बँकेच्या एटीएममधून पैसे काढल्यास महिन्याला पाच ट्रान्झॅक्शन मोफत करता येतात, सहाव्यांदा एटीएममधून पैसे काढताना अतिरिक्त पैसे द्यावे लागतात. तर इतर बँकांच्या एटीएममधून महिन्याला तीन मोफत ट्रान्झॅक्शन्सची मुभा आहे. मात्र केवळ दोन हजार रुपयेच एका दिवशी काढण्याची मर्यादा असल्यामुळे अनेकांना महिन्यातून पाचपेक्षा जास्त वेळा एटीएममधून पैसे काढावे लागू शकतात. 31 डिसेंबरपर्यंत तुम्ही दर महिन्याला कितीही वेळा एटीएममधून रक्कम काढलीत, तरी कोणतंही अतिरिक्त शुल्क भरावं लागणार नाही. तुम्ही तुमचं बँक खातं असलेल्या एटीएममधून पैसे काढा किंवा इतर बँकांच्या एटीएममधून, महिन्याला पाचपेक्षा जास्त व्यवहार झाले तरी त्यासाठी अतिरिक्त शुल्क आकारले जाणार नाही.