कर्नाटक मंत्र्याविरोधात बेळगावात मराठीजनांचा मोर्चा

बेळगाव : मराठीजनांची गळपेची करणारे कर्नाटकचे नगरविकास मंत्री रोशन बेग यांच्याविरोधात आज बेळगावात मोर्चा आयोजित करण्यात आला आहे. मध्यवर्ती महाराष्ट्र एकीकरण समिती मराठी परिपत्रकासाठी जिल्हाधिकारी कार्यालयावर मोर्चा काढणार आहे. बेळगावात आज दुपारी 12 वाजता संभाजी चौकातून जिल्हाधिकारी कार्यालयातवर हा मोर्चा काढण्यात येणार आहे. मोर्चात शिवसेनेच्या उपस्थितीबाबत अनिश्चितता मात्र या मोर्चात शिवसेनेच्या उपस्थितीवर प्रश्नचिन्ह निर्माण झालं आहे. कारण शिवसेनेने मोर्चात सहभागी होऊ नये, असं महाराष्ट्र एकीकरण समितीने सांगितल्या माहिती दिवाकर रावते यांनी दिली आहे. त्यामुळे आता शिवसेना पक्षप्रमुख उद्धव ठाकरेच निर्णय घेतील, असंहीरावते म्हणाले. कर्नाटकात महाराष्ट्राच्या मंत्र्यांना प्रवेशबंदी दरम्यान, महाराष्ट्राच्या मंत्र्यांना कर्नाटकच्या हद्दीत प्रवेशबंदीचा फतवा बेळगावच्या जिल्हाधिकाऱ्यांनी काढला आहे. राज्याचे परिवहन मंत्री दिवाकर रावते आणि आरोग्य मंत्री दीपक सावंत यांना बेळगाव जिल्ह्यात प्रवेशबंदी लागू करण्यात आली आहे. जिल्हाधिकारी आणि जिल्हा दंडाधिकाऱ्यांच्या आदेशानुसार 24 ते 27 मेपर्यंत ही प्रवेशबंदी लागू राहणार आहे. कर्नाटकातील नगरविकास मंत्री रोशन बेग यांनी सोमवारी जय महाराष्ट्रविरोधी फतवा काढल्यानंतर सीमा भागातील मराठी बांधव आक्रमक झाले आहेत. काय आहे प्रकरण? कर्नाटकात बेळगावसह सीमाभागातील महाराष्ट्र एकीकरण समितीच्या मराठी लोकप्रतिनिधींची गळचेपी सुरु आहे. लोकप्रतिनिधींनी जय महाराष्ट्र बोलल्यास किंवा कर्नाटकविरोधात घोषणा दिल्यास पद रद्द करण्याचा इशारा नगरविकास मंत्री रोशन बेग यांनी सोमवारी दिला होता. बेळगाव दौऱ्यावर आलेल्या रोशन बेग यांनी ही माहिती पत्रकारांना दिली होती. आगामी अधिवेशनात लोकप्रतिनिधींनी सार्वजनिक कार्यक्रमात, सभागृहात ‘जय महाराष्ट्र’ म्हटल्यास किंवा कर्नाटक राज्यविरोधी घोषणा दिल्यास त्याचं पद रद्द करणार, असा नवीन कायदा कर्नाटक सरकार अंमलात आणणार आहे. बेळगाव महापालिका सभागृहात याबाबत मंगळवारी बैठक घेणार असल्याचंही रोशन बेग यांनी स्पष्ट केलं होतं. एकीकडे अल्पसंख्यांक घटनात्मक अधिकार देण्यास टाळाटाळ सुरु असताना, एकीकरण समितीच्या लोकप्रतिनिधींची अशीही गळचेपी होणार आहे. त्यामुळे आता मराठी प्रेम तसंच महाराष्ट्र प्रेम दाखवणं लोकप्रतिनिधींच्या अंगलट येणार आहे. शिवसेना-मनसेचं चोख उत्तर कर्नाटकच्या नगर विकासमंत्री रोशन बेग यांना शिवसेनेनं चोख प्रत्युत्तर दिलं. कोल्हापुरातील मध्यवर्ती बस स्थानकात येणाऱ्या कर्नाटक राज्याच्या बसगाड्यांवर ‘जय महाराष्ट्र’ लिहून त्या बस कर्नाटकात परत पाठवल्या आहेत. जय महाराष्ट्रचे स्टिकर कर्नाटक परिवहनच्या बसवर लावल्यानं पुन्हा नवा वाद निर्माण झाला आहे. संबंधित बातम्या : अरेरावीची भाषा खपवून घेणार नाही, चंद्रकांत पाटलांचा रोशन बेगना सज्जड दम  शिवसेना आक्रमक, कर्नाटकच्या बसवर ‘जय महाराष्ट्र’चे स्टिकर्स  ‘जय महाराष्ट्र’ बोलल्यास पद रद्द, बेळगावात मराठी लोकप्रतिनिधींची गळचेपी कर्नाटकात महाराष्ट्राच्या मंत्र्यांना प्रवेशबंदी, जिल्हाधिकाऱ्यांचा फतवा