शॉकिंग! रिल्सचा नाद केला, जीवावर बेतला; व्हिडिओ 'शूट' करताना बंदुकीतून सुटली गोळी, युवक जागेवरच ठार

Delhi Shocking video: दिल्लीतील एका तरुणाचा रिल शूट करत असताना दुर्देवी मृत्यू झाला.

Man Dies While Shooting Reel with Gun

Source : canva

Man Dies While Shooting Reel with Gun: रिल्ससाठी कोण काय करेल, कोण कोणत्या थराला जाईल सांगता येत नाही. पूर्व दिल्लीतूनही असाच काहीसा प्रकार उघड झाला आहे. रिल्सच्या क्षुल्लक लाईक्स आणि कमेंट्ससाठी अनेक तरुण खटाटोप करताना दिसतात.  अशातच दिल्लीतील एका तरुणानेही व्हिडीओ तयार करत असताना आपल्या जीवाची बाजी लावली.  स्टंट करत असताना  एका तरुणाचा गोळी लागून मृत्यू झाला. मिळालेल्या माहितीनुसार, हा तरुण पिस्तूल हाताळत स्टंट करत असताना अचानक गोळी सुटली. गोळी थेट छातीत घुसली. यात तरुणाचा जागीच मृत्यू झाला.  या घटनेचा व्हिडीओ सध्या सोशल मीडियात व्हायरल होत आहे.

मिळालेल्या माहितीनुसार, पवन कुमार (वय वर्ष 28) असे मृत तरुणाचे नाव आहे. तो दल्लूपुरा गावचा रहिवासी असल्याची माहिती आहे.  दिल्ली पोलिसांनी दिलेल्या माहितीनुसार, 16 मार्च रोजी, न्यू अशोक नगर पोलीस ठाण्याला, वसुंधरा एन्क्लेव्ह येथील धर्मशिला रुग्णालयातून एका तरुणाला गोळी लागल्याची माहिती मिळाली होती.  माहिती मिळताच पोलिसांच्या टीमने थेट हॉस्पिटल गाठले. 

हॉस्पिटलमध्ये पवन कुमारला बेशुद्ध अवस्थेत रुग्णालयात दाखल करण्यात आले होते. तरुणाच्या छातीच्या डाव्या बाजूला गोळी लागल्याची माहिती आहे. पवन कुमारला  रुग्णालयात दाखल करताच डॉक्टरांनी त्याला तपासले. तसेच मृत घोषित केले. पोलिसांच्या प्राथमिक तपासात असे उघड झाले की, पवन कुमार हा चुलत भाऊ  हिमांशुच्या परवानाधारक पिस्तुलाने  स्टंट करत होता. तर, हिमांशु हा पवनचा व्हिडीओ शूट करत होता.  त्यानंतर पवनने पिस्तुलात मॅगझिन घालून, आपल्या छातीवर ठेवले. तसेच ट्रिगर दाबले. यामुळे बंदुकीतील गोळी थेट काळजात घुसली. यात त्याचा मृत्यू झाला.

या घटनेची माहिती मिळताच क्राइम टीम आणि फोरेंसिक टीमने हॉस्पिटलमध्ये धाव घेतली. पोलिसांनी तपास करत परवानाधारक पिस्तूल जप्त केली. तसेच हिमांशुचा मोबाइलही जप्त केला.  व्हिडीओच्या प्राथमिक तपासातून हे स्पष्टपणे दिसून येते की, पवन स्वत:च  शस्त्र हाताळत होता. त्याचवेळी हा अपघात घडला आहे. सध्या मृतदेह शवविच्छेदनासाठी रुग्णालयात पाठवण्यात आले असून,  पोलिसांनी या प्रकरणी एफआयआर दाखल केला आहे. सध्या अधिक तपास पोलिसांकडून सुरु आहे. या घटनेनंतर परिसरात तसेच इंटरनेटवर खळबळ उडाली आहे. 

महत्त्वाच्या इतर बातम्या: