Bhandara Crime News : प्रेमसंबंधात अडसर ठरणाऱ्या पत्नीनं प्रियकराच्या मदतीनं आपल्याच पतीची गळा आवळून हत्या केली आहे. तसेच पुरावा नष्ट करण्याच्या उद्देशानं पतीचा मृतदेह जंगलातील नाल्यात फेकून दिला. ही खळबळजनक घटना भंडारा (Bhandara) जिल्ह्यातील अड्याळ पोलीस ठाण्याच्या हद्दीतील माडगी जंगलात उघडकीस आली. पोलिसांनी तपासाची चक्रे फिरवली असता, या प्रकरणात पतीपासून विभक्त राहणारी पत्नी आपल्या प्रियकरासोबत लिव्ह इन रिलेशनशिपमध्ये राहत असल्याची बाब समोर आली. या थरारक घटनेमुळे भंडारा जिल्ह्यात एकच खळबळ उडाली आहे.
प्रेमसंबंधातून पतीची हत्या
भंडारा जिल्ह्यातील अड्याळ पोलीस ठाण्याच्या हद्दीतील प्रेमसंबंधातून प्रियकराच्या मदतीनं पतीची हत्या झाल्याची बाब उघडकीस आली आहे. याप्रकरणी अड्याळ पोलिसांनी आरोपी पत्नी आणि तिचा आरोपी प्रियकर या दोघांवरही गुन्हा दाखल करीत त्यांना बेड्या ठोकल्या आहेत. आदेश राऊत (38) असे हत्या करण्यात आलेल्या पतीचे नाव आहे. तर प्रियकर विक्की करकाडे (38) आणि पत्नी ज्योती राऊत (35) असे या दोन आरोपीचे नाव आहे.
पत्नीने प्रियकराच्या मदतीने काढला काटा
या घटनेतील मृतपती आदेश राऊत आपल्या पत्नीसह राहत होता. याच गावात प्रियकर विक्की करकाडे हा देखील राहत होता. मृत आदेश राऊत यांची पत्नी ज्योती राऊत आणि प्रियकर विक्की करकाडे यांच्यात प्रेमसंबंध होते. कालांतराने ज्योती राऊत या आपल्या पतीपासून विभक्त राहून प्रियकर विक्की करकाडे सोबत लिव्ह इन रिलेशनशिपमध्ये राहत होती. याबाबत पतीला कुणकुण लागेल आणि आपल्या प्रेमसंबंध उघडकीस येईल ही भीती पत्नी आणि प्रियकरला होती.
या भीतीपोटी या दोघांनी प्रेमसंबंधात अडसर ठरू पाहणाऱ्या पतीची हत्या करण्याची योजना आखली. याच मनसुब्यात असलेल्या प्रियकर आणि पत्नीने संधी मिळताच आदेश राऊत यांची दोरीने गळा आवळून हत्या केली. विशेष बाब म्हणजे हत्या केल्या नंतर या दोघांनी मिळून पोलिसांना गुंगारा देण्याचा प्रयत्न केला. कुणाला आपल्या कृत्याची खबर लागू नये यासाठी पुरावा नष्ट करण्याच्या उद्देशानं पतीचा मृतदेह जंगलातील नाल्यात फेकून दिला. मात्र याप्रकरणी अड्याळ पोलिसांनी मोठ्या शिताफीने तपास करून प्रकरणाचा छडा लावला. या प्रकरणी आरोपी पत्नी आणि तिचा प्रियकर या दोघांवरही गुन्हा दाखल करीत त्यांना बेड्या ठोकल्या आहेत.