Maratha Reservation : मराठा आरक्षणाच्या आंदोलनाला दुसऱ्या दिवशीही 'हिंसक वळण'; नांदेडसह बीडमध्ये एसटी बसवर दगडफेक

Maratha Reservation : बसचे मोठ्या प्रमाणात नुकसान झाले असून, प्रवाशांना आधीच खाली उतरवण्यात आल्याने कोणतेही जीवितहानी झालेली नाही. 

Stone pelting on ST bus

बीड : मराठा आरक्षणाच्या (Maratha Reservation) मागणीसाठी राज्यभरात वेगवेगळ्या पद्धतीने आंदोलन करण्यात येत आहे. दरम्यान, काही ठिकाणी या आंदोलनाला हिंसक वळण लागत असल्याचे सुद्धा समोर येत आहे. आज देखील बीड (Beed) आणि नांदेड (Nanded) जिल्ह्यात एसटी बसवर दगडफेक करण्यात आली आहे. यात बसचे मोठ्या प्रमाणात नुकसान झाले असून, प्रवाशांना आधीच खाली उतरवण्यात आल्याने कोणतेही जीवितहानी झालेली नाही. 

बीडमध्ये रात्रीपासूनच मराठा आरक्षणाच्या आंदोलनाला हिंसक लागल्याचे पाहायला मिळत आहे. रात्री मराठा आंदोलकांनी एका बसला आग लावल्यानंतर आज सकाळी पुन्हा एकदा कल्याण-बीड या बसवर आंदोलकांनी दगडफेक केली आहे. यामध्ये बसचे प्रचंड नुकसान झाले आहे. बीडहून कल्याणकडे जाणारी एसटी बस चराटा फाट्याजवळ आली असता, यावेळी आंदोलकांनी प्रवाशांना खाली उतरवून या बसवर तुफान दगडफेक केली. यामध्ये बसच्या संपूर्ण काचा फुटल्या आहेत. तर, रात्री मराठा आरक्षणाच्या प्रश्नावरून आंदोलकांनी पालीजवळ एका बसला आग लावली होती. त्यानंतर पुन्हा एकदा एसटी बसवर दगडफेक करण्यात आली आहे. 

नांदेडमध्येही बसवर दगडफेक...

बीडप्रमाणेच नांदेड जिल्ह्यात देखील आरक्षणावरून मराठा समाज आक्रमक होतांना पाहायला मिळत आहे. शनिवारी नांदेड जिल्ह्यातील हदगांव तालुक्यातील मार्लेगांव जवळ रात्री अज्ञात लोकांनी एसटी बस थांबवून पेटवून दिली होती. तर, आज पुन्हा एक बसवर दगडफेक करण्यात आली आहे. नांदेडच्या माहूर तालुक्यातील आष्टा फाटा इथे अज्ञात मंडळीने एसटी बसेसवर दगडफेक केलीय. यात एसटी बसेसच्या काचा फुटून नुकसान झालंय. या प्रकरणी पोलीस दगडफेक करणाऱ्या लोकांचा शोध घेतायत.

अज्ञात लोकांनी पेटवून दिली एसटी बस...

नांदेड जिल्ह्यातील हदगांव तालुक्यातील मार्लेगांव जवळ रात्री अज्ञात लोकांनी एसटी बस थांबवून पेटवून दिली होती. बसमध्ये असलेले सर्व 73 प्रवाशी सुरक्षित आहेत. मात्र, लावलेल्या या आगीत एसटी बस पूर्णपणे जळून खाक झालीय. नांदेडच्या हदगांव आगाराची ही बस नागपूरकडे जात होती. त्याचवेळी मराठवाडा - विदर्भ सीमेवरच्या पैनगंगा नदीच्या पुलावर बसला थांबवत अज्ञात लोकांनी आग लावलीय. या घटनेमागे मराठा आरक्षणाच्या आंदोलकांचा हाथ असावा अशी शक्यता वर्तवली जातेय. कारण विदर्भाच्या सीमेवर असलेल्या हदगांव तालुक्यात मराठा आरक्षणासाठीचे आंदोलन मोठया प्रमाणात सुरू आहे. दरम्यान, बस पेटवून देणारे नेमके कोण होते याचा पोलीस शोध घेत आहेत.

इतर महत्वाच्या बातम्या: