Urea Shortage : इराण युद्धामुळे युरिया टंचाईची शक्यता, LNG तुटवड्यामुळे खत उत्पादनावर परिणाम

Urea Shortage India : युरिया खताच्या निर्मितीसाठी एलएनजी हा प्रमुख कच्चामाल म्हणून वापरला जातो. त्यासाठी आखाती देशाकडून एलएनजी आयात केलं जातं. 

Urea Shortage India

Source : abp majha

बीड : पश्चिम आशियातील युद्धजन्य परिस्थितीमुळे शेतीसाठी अत्यावश्यक असलेल्या युरिया खताच्या टंचाईचे संकट निर्माण होण्याची चिन्हं दिसू लागली आहेत. अमेरिका, इस्रायल आणि इराण यांच्यातील संघर्षामुळे लिक्विड नॅचरल गॅस (LNG) पुरवठ्यावर परिणाम झाला असून, त्याचा थेट फटका खत उत्पादन क्षेत्राला बसत आहे. त्यामुळे बीड जिल्ह्यात खरीप हंगामापूर्वी टंचाईची भीती व्यक्त करण्यात येत आहे.

आगामी खरीप हंगामासाठी बीड जिल्ह्याने सुमारे 64 हजार मेट्रिक टन युरियाची मागणी केली आहे. मात्र सध्याच्या परिस्थितीत प्रत्यक्षात किती साठा उपलब्ध होईल याबाबत अनिश्चितता निर्माण झाली आहे.

LNG Crisis India : एलएनजी तुटवड्याचा खत उत्पादनावर परिणाम

युरिया खताच्या निर्मितीसाठी एलएनजी हा प्रमुख कच्चामाल म्हणून वापरला जातो. भारतातील 18 हून अधिक खत उत्पादक कंपन्या मोठ्या प्रमाणावर अखाती देश आणि रशिया येथून गॅस किंवा तयार युरियाची आयात करतात.

मात्र युद्धामुळे समुद्री वाहतूक विस्कळीत झाली आहे. यामुळे एलएनजीचे दर मोठ्या प्रमाणावर वाढले असून, खत प्रकल्पांना गॅस पुरवठा कमी झाला आहे. परिणामी युरिया उत्पादनाची गती मंदावली आहे.

Kharif Season Impact : खरीप हंगामावर परिणाम होण्याची भीती

युरिया हा खरीप हंगामातील प्रमुख खत असल्याने या टंचाईचा थेट परिणाम शेतकऱ्यांवर होण्याची शक्यता आहे. उत्पादन घटल्यास बाजारात खताचा तुटवडा निर्माण होऊन दरवाढ होण्याचीही शक्यता वर्तवली जात आहे.

Expert Reaction On Urea Shortage : तज्ज्ञांकडून इशारा

या पार्श्वभूमीवर ऑल इंडिया अ‍ॅग्रो इनपुट डीलर असोसिएशनचे राष्ट्रीय अध्यक्ष मोहन कलंत्री यांनी चिंता व्यक्त केली आहे. त्यांनी सांगितले की, एलएनजी तुटवड्यामुळे खत उत्पादनावर परिणाम होत असून, सरकारने तातडीने उपाययोजना करण्याची गरज आहे.

पश्चिम आशियातील युद्धाचा परिणाम आता थेट भारतीय शेतीवर होत असल्याचे चित्र स्पष्ट होत असून, खरीप हंगामापूर्वीच खत टंचाईची भीती निर्माण झाली आहे.

ही बातमी वाचा: