दिल्ली पोलिसांकडून मनोरमा खेडकरांचे नामनिर्देशन पत्राची चौकशी
Pooja Khedkar: पथकाने तहसील कार्यालयातच डॉ. खेडकर यांनी जे नामनिर्देशन पत्र दाखल केले होते त्याची माहिती घेतली.
Pooja Khedkar अहमदनगर: वादग्रस्त आयएएस अधिकारी पूजा खेडकर यांच्या कुटुंबाच्या संदर्भातील कागदपत्रांची माहिती घेण्यासाठी काल पाथर्डी येथील तहसील कार्यालयात दिल्ली पोलिसांचे दोन जणांचे पथक आले होते. या पथकाने स्थानिक प्रशासनाकडून पूजा खेडकर यांच्या आई आणि भालगावच्या माजी लोकनियुक्त सरपंच डॉ. मनोरमा खेडकर यांनी ग्रामपंचायत निवडणूक लढवताना जे नामनिर्देशन पत्र तहसील कार्यालयातील निवडणूक शाखेत दाखल केले होते ते नामनिर्देशन पत्र आपल्या ताब्यात घेतले.
पोलिसांचे पथक खेडकर (Pooja Khedkar) कुटुंबाचे गाव असलेल्या भालगाव येथे सुद्धा जाईल असे वाटत होते. मात्र भालगावला न जात या पथकाने तहसील कार्यालयातच डॉ. खेडकर यांनी जे नामनिर्देशन पत्र दाखल केले होते त्याची माहिती घेतली. डॉ. खेडकर यांनी मागील वेळेस झालेल्या जिल्हा परिषदेच्या निवडणुकीत उमेदवारी केली होती. मात्र त्यांना पराभवाला सामोरे जावे लागले होते, तर त्यानंतर झालेल्या भालगाव गावच्या लोकनियुक्त सरपंच निवडणुकीत त्या उभ्या राहिल्या आणि बहुमताने निवडूनसुद्धा आल्या होत्या. मात्र त्यानंतर पुन्हा एकदा झालेल्या ग्रामपंचायत निवडणुकीत त्यांना पराभवाचा सामना करावा लागला होता. या निवडणुकीत डॉ. खेडकर यांनी जे नामनिर्देशन पत्र दाखल केले होते आणि त्याच्यासोबत जी कागदपत्रे निवडणूक शाखेत दाखल केली होती. त्या सर्व कागदपत्रांची आज दिल्लीच्या पथकाने छाननी करत या कागदपत्रांच्या प्रति आपल्यासोबत नेल्या. या संदर्भात या पथकाकडून माहिती घेण्याचा प्रयत्न केला असता त्यांनी या विषयावर बोलण्यास नकार दिला.
नेमकं प्रकरण काय?
पूजा दिलीप खेडकर (Pooja Khedkar) 2023 च्या बॅचच्या आयएएस अधिकारी होती. केंद्रीय लोकसेवा आयोगाच्या (UPSC) परीक्षेत तिने 841 वा क्रमांक पटकावला होता. काही महिन्यापूर्वी सहायक जिल्हाधिकारी अधिकारी म्हणजेच प्रोबेशनरी ऑफिसर म्हणून पुणे जिल्ह्यात तिची नियुक्ती करण्यात आली होती. पण प्रशिक्षणाच्या काळातच पुण्याच्या जिल्हाधिकारी कार्यालयाकडं अवास्तव मागण्या केल्यामुळं आणि अरेरावी वर्तनामुळं तिच्याबाबत प्रचंड चर्चा झाली. त्यानंतर तिथून वाशिम इथं बदली करण्यात आली होती. पूजा खेडकरने (Pooja Khedkar) दृष्टिदोष प्रवर्गातून UPSC परीक्षा उत्तीर्ण केली आणि मानसिक आजाराचे प्रमाणपत्र सादर केले. याच आधारावर तिला विशेष सवलत मिळाली आणि ती आयएएस झाली. त्यानंतर तिला सहावेळा वैद्यकीय तपासणीसाठी बोलवण्यात आलं. पण प्रत्येक वेळी त्या अनुपस्थित राहिली. तसेच पूजा खेडकरनी (Pooja Khedkar) स्वतःच्या नावात, तिच्या वडिलांच्या नावात तसेच आईच्या नावात बदल करून केंद्रीय लोकसेवा आयोगाची फसवणूक केल्याचं या चौकशीत समोर आलं आहे. पूजा खेडकरनी (Pooja Khedkar) परीक्षेचा फॉर्म भरत असताना फोटो, सही, ईमेल आयडी, मोबाईल नंबर आणि पत्ता बदलून परीक्षा देण्याची कमाल मर्यादा ओलांडली असल्याचं यूपीएससीने सांगितलं. त्यानंतर तिच्यावर कारवाई करण्यात आली आहे.
महत्त्वाच्या बातम्या
