Sooryavanshi Movie Trailer | अक्षय कुमारच्या बहुप्रतिक्षित सूर्यवंशी सिनेमाचा ट्रेलर प्रदर्शित

दिग्दर्शक रोहित शेट्टी आणि खिलाडी अक्षय कुमारच्या मोस्ट अवेटेड सुर्यवंशी सिनेमाचा ट्रेलर आज रिलीज झाला आहे. येत्या 24 मार्चला सिनेमा प्रेक्षकांच्या भेटीला येत आहे.

मुंबई : दिग्दर्शक रोहित शेट्टी आणि खिलाडी अक्षय कुमारच्या मोस्ट अवेटेड सुर्यवंशी सिनेमाचा ट्रेलर आज रिलीज झाला आहे. सिंघम आणि सिंबा सिनेमानंतर रोहित शेट्टीच्या या आगामी सिनेमाकडे सगळ्यांचं लक्ष आहे. 'सूर्यवंशी' सिनेमाच्या चार मिनिटांच्या ट्रेलरमध्ये अक्षय कुमारची दमदार अॅक्शन पाहायला मिळत आहे. ट्रेलरला सोशल मीडियावर चांगला प्रतिसाद मिळत आहे.

सूर्यवंशी सिनेमात अक्षय कुमारसोबत अजय देवगन, रणवीर सिंह, कॅटरिना कैफ, जकी श्रॉफ, जावेद जाफरी हे देखील दिसत आहेत. सिनेमातील ट्रेलरवरुन रणवीर सिंह आणि अजय देवगन पाहुण्या कलाकाराच्या भूमिकेत असल्याचं दिसून येत आहे. मात्र तीन मोठे कलाकार एका फ्रेम दिसतायेत, हे त्यांच्या चाहत्यांसाठी आनंदाची गोष्ट आहे.

पोलीस दलावर आधारित सिंघम आणि सिंबा सिनेमानंतरचा हा तिसरा सिनेमा आहे. येत्या 24 मार्चला हा सिनेमा प्रेक्षकांच्या भेटीला येणार आहे. अक्षय कुमारने काही दिवसांपूर्वी आपल्या ट्विटर अकाऊंटवरुन सूर्यवंशीचा टीझर शेअर केला होता. या ट्वीटला कॅप्शन देताना अक्षयने म्हटलं होतं की, गुन्हेगारीचा खात्मा होणार, कारण पोलीस येत आहेत.

'सिंबा' सिनेमाच्या क्लायमॅक्सच्या सीनमध्ये अक्षय कुमार एटीएस अधिकारी वीर सूर्यवंशीच्या रुपात दिसला होता. या सिनेमाचं दिग्दर्शन रोहित शेट्टी करत आहे. त्यामुळे सिनेमात पुरेपूर अॅक्शन सीन्स असणार हे वेगळं सांगायला नको. सिनेमाच्या ट्रेलरला काही वेळात लाखो व्ह्यूज यूट्युबला मिळाल्या आहेत. त्यामुळे सूर्यवंशीचा ट्रेलर प्रेक्षकांच्या पसंतीला उतरलाय असंच म्हणावं लागेल.