Vitamin B12 Deficiency : आपल्या शरीरात जीवनसत्त्वांचे (Vitamin) उत्पादन फारच नगण्य प्रमाणात होतं. अशा परिस्थितीत त्याची कमतरता भरुन काढण्यासाठी आपल्याला अन्नातून जीवनसत्त्वे घ्यावी लागतात. निरोगी राहण्यासाठी माणसाला विविध प्रकारच्या जीवनसत्त्वांची गरज असते. वेगवेगळ्या प्रकारची जीवनसत्त्वे आपल्या शरीरात वेगवेगळी कार्ये करतात. शरीरात जीवनसत्त्वांची कमतरता असल्यास अनेक प्रकारच्या समस्यांना सामोरं जावं लागतं.


शरीरात जीवनसत्त्वांची कमतरता आहे हे शोधणं अनेकदा कठीण असतं. कारण त्यांची लक्षणे फारच उशिरा दिसू लागतात. वेळीच याचा शोध लागला नाही तर अनेक गंभीर समस्यांच्या सामना करावा लागू शकतो. त्यामुळे तुमच्या शरीरात होणाऱ्या  छोट्या-छोट्या बदलांकडे दुर्लक्ष करु नका.


इतर जीवनसत्त्वांप्रमाणे, व्हिटॅमिन बी 12 (Vitamin B12) देखील शरीरासाठी खूप महत्त्वाचे समजलं जातं. हे जीवनसत्त्व केवळ लाल रक्तपेशी आणि डीएनएच्या निर्मितीसाठीच आवश्यक नाही, तर मेंदू आणि चेतापेशींच्या विकासातही महत्त्वाची भूमिका बजावतं. व्हिटॅमिन बी 12 मांस, अंडी आणि दुग्धजन्य पदार्थांमध्ये आढळते. शरीरात व्हिटॅमिन बी 12 च्या कमतरतेमुळे हृदयाशी संबंधित समस्या, वंध्यत्व, थकवा, स्नायू कमकुवत होणे आणि मज्जासंस्थेशी संबंधित समस्या उद्भवू शकतात. यासोबतच शरीरात व्हिटॅमिन बी 12 ची कमतरता असल्यास त्याची लक्षणेही जिभेवर दिसू लागतात.


वेबमेड या हेल्थ वेबसाईटनुसार, शरीरात व्हिटॅमिन बी 12 च्या कमतरतेमुळे लोकांना जिभेतील अल्सरच्या समस्येचा सामना करावा लागतो. अशा स्थितीत तुम्हाला जिभेवर किंवा हिरड्यांमध्ये अल्सर होऊ शकतो. जिभेवर तयार झालेले व्रण सामान्यतः आपोआप बरे होतात, परंतु जर तुम्हाला वेदना आणि जळजळ टाळायची असेल तर आंबट आणि अधिक तिखट पदार्थांचं सेवन करणं टाळा. यासाठी बाजारात अनेक प्रकारची औषधेही उपलब्ध आहेत, ज्यामुळे तुमचा त्रास कमी होऊ शकतो.


वेबमेडनुसार, जिभेवर फोड निर्माण होण्यासोबतच जीभ फारत गुळगुळीत होणं हे देखील व्हिटॅमिन बी 12 च्या कमतरतेचं लक्षण आहे. जिभेवर असलेल्या लहान दाण्यांना पॅपिला म्हणतात, परंतु शरीरात व्हिटॅमिन बी 12 च्या कमतरतेमुळे, हे दाणे पूर्णपणे गायब होतात आणि तुमची जीभ अगदी गुळगुळीत होते. परंतु जीभ गुळगुळीत होण्याचे कारण केवळ व्हिटॅमिन बी 12 ची कमतरता एवढंच नाही तर काही वेळा तुमची जीभ संसर्ग आणि औषधांमुळे गुळगुळीत होऊ शकते.


व्हिटॅमिन बी 12 च्या कमतरतेची लक्षणे
शरीरात व्हिटॅमिन बी 12 च्या कमतरतेची इतरही अनेक लक्षणे आहेत, त्याबद्दल जाणून घेऊया
 
- शरीरात उर्जेची कमतरता
- स्नायू कमकुवत होणे
- अंधुक दिसणे 
- नैराश्य आणि गोंधळ यासारख्या मानसिक समस्या
- स्मरणशक्ती कमकुवत होणे, तसंत काही गोष्टी समजण्यात अडचण
- शरीरात मुंग्या येणे


या पदार्थांमध्ये व्हिटॅमिन बी 12 चं प्रमाण जास्त
नॅशनल हेल्थ सर्व्हिस (NHS) नुसार, 19 ते 64 वयोगटातील लोकांना दररोज 1.5 मायक्रोग्रॅम व्हिटॅमिन बी 12 ची आवश्यकता असते. अशा परिस्थितीत, कोणत्या गोष्टींमध्ये व्हिटॅमिन बी 12 आढळते ते जाणून घेऊया - 


- मांस 
- मासे 
- दूध 
- चीज 
- अंडी 
- तृणधान्ये 
याशिवाय, व्हिटॅमिन बी 12 चे अनेक सप्लिमेंट्स बाजारात उपलब्ध आहेत, परंतु त्यांचं सेवन करण्यापूर्वी डॉक्टरांचा सल्ला अवश्य घ्या.