Yoga For Control Hairfall : केस गळण्याची (Hair Care Tips) समस्या सामान्य आहे. अनेकांचे केस खूप कमकुवत, पातळ आणि निर्जीव असतात. त्याचबरोबर वयानुसार केसांचा रंगही कमी होऊ लागतो. याचे कारण म्हणजे बिघडलेली जीवनशैली आणि आहारातील पोषणाचा अभाव. केस व्यक्तीचं सौंदर्य खुलवतात. स्त्री आणि पुरुष दोघांनाही काळे आणि दाट केस हवे असतात पण केसांच्या समस्यांमुळे ते त्रस्त असतात.
केसांच्या समस्या कमी करण्यासाठी विविध महागडी केसांचे प्रोडक्ट्स वापरले जातात. केस पांढरे होणे किंवा केसगळती कमी करण्यासाठी काही योगासनं तुमच्यासाठी फायदेशीर ठरतील. या ठिकाणी आम्ही तुम्हाला काही योगासनांची नावं सांगणार आहोत ज्यामुळे तुमची केसगळती कमी होईलच पण तुमचे केसही घनदाट होतील.
शीर्षासन
शीर्षासन केल्याने डोक्याकडे होणारा रक्तप्रवाह सुधारतो आणि केसांची वाढ चांगली होते. ज्यांचे केस गळत आहेत, निर्जीव होत आहेत किंवा केस पांढरे होण्याची समस्या आहे त्यांनी शिर्षासन करावे. तणाव कमी करण्यासाठी शिर्षासनाचा सराव करता येतो. हे आसन करण्यासाठी दोन्ही हात डोक्याच्या मागे घेऊन खाली वाकून डोके खाली ठेवा. शरीराचा समतोल राखताना पाय वरच्या बाजूला हलवा. डोक्यावर उभे असताना संतुलन राखा आणि सरळ व्हा.
बालासन
बालासनाच्या सरावाने पोटाशी संबंधित समस्या आणि तणावापासून आराम मिळू शकतो. पोटाच्या समस्या आणि तणावामुळे केस गळतात. त्यामुळे केसांची वाढ आणि घट्ट होण्यासाठी बालासन फायदेशीर ठरू शकते. हे आसन करण्यासाठी गुडघे वाकवून वज्रासनाच्या आसनात बसा. आता आपले हात वरच्या दिशेने हलवत दीर्घ श्वास घ्या. नंतर श्वास सोडताना शरीराला पुढे वाकवा. या स्थितीत डोके जमिनीवर आणि पोट मांड्यांवर ठेवा.
त्रिकोनासन
केस अकाली पांढरे होत असतील, केसांमध्ये कोरडेपणा जाणवत असेल आणि केस जास्त गळल्यामुळे पातळ दिसत असतील तर त्रिकोणासन करा. हे आसन करण्यासाठी दोन्ही पाय काही अंतरावर ठेवून उभे रहा. आता तुमचे हात आणि खांदे सरळ ठेवून वरच्या दिशेने करा. उजव्या बाजूला वाकून उजव्या हाताने पायाला स्पर्श करा. या दरम्यान, डावा हात वर करा. दुसऱ्या बाजूने ही प्रक्रिया पुन्हा करा.
उत्तानासन
उत्तानासनाचा नियमित सराव केल्यास केसांच्या समस्या कमी होतात. हे आसन करण्यासाठी सरळ उभे रहा. आता दीर्घ श्वास घ्या आणि दोन्ही हात वरच्या दिशेने हलवा आणि श्वास सोडा. नंतर हात जमिनीच्या दिशेने खाली करा आणि पायाच्या बोटांना स्पर्श करण्याचा प्रयत्न करा.
टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही.
महत्त्वाच्या बातम्या :