Visakha Subedar Son Stuck In Kuwait: 'मदत करा, माझा मुलगा कुवेतमध्ये अडकलाय, त्याला परत आणा...'; मराठी अभिनेत्री विशाखा सुभेदारांची आर्त हाक, पंतप्रधान, मुख्यमंत्र्यांसह राज ठाकरेंनाही साकडं
Visakha Subedar Son Stuck In Kuwait: अभिनेत्री विशाखा सुभेदार यांचा मुलगा सध्या कुवेतमध्ये अडकला आहे. त्यांनी रडत रडत एक व्हिडीओ पोस्ट केलाय, त्या व्हिडीओ मुलाला परत आणण्यासाठी मुख्यमंत्री आणि पंतप्रधानांना साकडं घातलंय.
Visakha Subedar Son Stuck In Kuwait: इस्रायल (Israel) आणि अमेरिकेकडून (America) इराणवर (Iran) करण्यात आलेल्या संयुक्त हल्ल्यानंतर सध्या संपूर्ण जगाचं टेन्शन वाढलं आहे. मध्य पूर्वेतील तणाव (Israel vs Iran War) दिवसागणिक वाढत असतानाच, त्याचा परिणाम जगभरातील प्रवासी वाहतुकीवर झाला आहे. इराणनं कुवेत, दुबईसह अनेक देशांवर हल्ले केल्यानंतर जगभरातील प्रवाशांवर त्याचा परिणाम झाल्याचं दिसून आलं. आखाती देशांमधील तणावपूर्ण परिस्थितीनंतर अनेक देशांनी आपलं हवाई क्षेत्र बंद केलंय. तसेच, दुबई विमानतळही बंद करण्यात आलंय आणि अनेक उड्डाणं रद्द करण्यात आलीत. अशातच भारतातील अनेक प्रवासी आखाती देशांमध्ये अडकून पडलेत. दुबईत अडकलेल्या काही प्रवाशांना विमानानं मुंबई आणि बंगळुरूमध्ये आणण्यात आलं. पण, त्यासोबतच कुवेतमध्येही काही भारतीय अडकल्याची माहिती मराठी अभिनेत्री विशाखा सुभेदार (Visakha Subedar) यांनी एक व्हिडीओ शेअर करुन दिली आहे.
अभिनेत्री विशाखा सुभेदार यांचा मुलगा सध्या कुवेतमध्ये अडकला आहे. अभिनेत्रीचा मुलगा लंडनला निघाला होता. मुंबईवरुन निघालेलं त्याचं विमान कुवेतमध्ये उतरवण्यात आलं. पण, आखाती देशांमध्ये वाढलेल्या तणावपूर्ण परिस्थितीच्या पार्श्वभूमीवर सर्व उड्डाणं रद्द करण्यात आलीत. अभिनेत्रीचा मुलगा चार दिवसांपासून कुवेतमधील एका हॉटेलमध्ये आहे. अशातच अभिनेत्रीनं मुख्यमंत्री देवेंद्र फडणवीस, पंतप्रधान नरेंद्र मोदी, उपमुख्यमंत्री एकनाथ शिंदे आणि मनसे अध्यक्ष राज ठाकरे यांना मदतीसाठी आवाहन केलं आहे.
मराठी अभिनेत्री विशाखा सुभेदार यांनी रडत रडतच एक व्हिडीओ शेअर केला आहे. त्या व्हिडीओमधून त्यांनी मुख्यमंत्री देवेंद्र फडणवीस आणि देशाचे पंतप्रधान नरेंद्र मोदी यांना साकडं घातलं आहे. विशाखा सुभेदार यांचा मुलगा लंडनला गेला होता. त्याचं विमान कुवेतमध्ये उतरवण्यात आलेलं आणि सध्या गेल्या चार दिवसांपासून तो कुवेतमध्येच अडकला आहे. तिथली परिस्थिती गंभीर झाली असून त्याला भारतात परत आणण्याची व्यवस्था करावी, अशी विनंती विशाखा सुभेदार यांनी केली आहे.
विशाखा सुभेदार नेमकं काय म्हणाल्या?
विशाखा सुभेदार यांनी त्यांच्या इन्स्टाग्राम हँडलवरुन एक व्हिडीओ पोस्ट केलाय. या व्हिडीओमध्ये विशाखा सुभेदार यांनी आपल्या कुवेतमध्ये अडकलेल्या मुलाला भारतात सुखरुप आणण्याची विनंती पंतप्रधानांकडे केली आहे. तसेच, हा व्हिडीओ शेअर करताना "कृपया मला मदत करावी. माझा मुलगा अभिनय कुवेतमध्ये अडकला आहे. #IndiaGovernment #NarendraModi #DevendraFadnavis देवेंद्र फडणवीस साहेब, एकनाथ शिंदे साहेब, राज साहेब... कृपया मदत करावी...", असं कॅप्शन लिहिलंय.
मराठी अभिनेत्री विशाखा सुभेदार म्हणाल्या की, "नमस्कार मी विशाखा सुभेदार... माझी महाराष्ट्राचे मुख्यमंत्री देवेंद्र फडणवीस, देशाचे पंतप्रधान नरेंद्र मोदी यांना विनंती आहे... माझा मुलगा लंडनच्या प्रवासाला निघाला होता. मात्र, कुवेतमध्ये त्याचं फ्लाईटमध्ये उतरवण्यात आले आहे. गेल्या चार दिवसांपासून तिथं एअर स्पेस नसल्यामुळे विमानं रद्द करण्यात आली आहेत. माझा मुलगा गेल्या चार दिवसांपासून कुवेतमध्ये अडकलाय. आता तिथली परिस्थिती गंभीर होत चालली आहे. तिथे ड्रोन हल्ले होत आहेत. त्यांना भारतात परत आणण्याची व्यवस्था करावी. भारतीयांना परत आणण्याची व्यवस्था करावी, अशी माझी कळकळीची विनंती आहे. आमच्या मुलांची काळजी घ्यावी, ही विनंती सरकारला करतेय. लवकरात लवकर मार्ग काढावा..."
पाहा व्हिडीओ : माझा मुलगा कुवेतमध्ये अडकलाय, त्याला सुखरूप परत आणा, Devendra Fadnavis यांना विनंती
महत्त्वाच्या इतर बातम्या :
महत्त्वाच्या बातम्या
