Onkar Bhojane: 'हास्यजत्रा' सोडण्याचं कारण काय? ओंकार भोजने म्हणाला...
ओंकारनं (Onkar Bhojane) एबीपी माझाला दिलेल्या मुलाखतीमध्ये त्याच्या 'सरला एक कोटी' (Sarla Ek Koti ) या आगामी चित्रपटाबाबत सांगितलं. तसेच या मुलाखतीमध्ये ओंकारला हास्यजत्रा सोडण्याचं कारण देखील विचारण्यात आलं.
Onkar Bhojane: अभिनेता ओंकार भोजने (Onkar Bhojane) हा वेगवेगळे शो आणि चित्रपटांमधून प्रेक्षकांच्या भेटीस येतो. महाराष्ट्राची हास्यजत्रा (Maharashtrachi Hasyajatra) या कार्यक्रमामधील ओंकारच्या विनोदी अंदाजानं प्रेक्षकांच्या मनावर छाप सोडली. आता ओंकार हा 'सरला एक कोटी' (Sarla Ek Koti) या चित्रपटामधून प्रेक्षकांच्या भेटीस येणार आहे. या चित्रपटाचा ट्रेलर काही दिवसांपूर्वी प्रदर्शित झाला. या ट्रेलरमधील ओंकारच्या लूकनं आणि अभिनयानं अनेकांचे लक्ष वेधले. ओंकारनं एबीपी माझाला दिलेल्या मुलाखतीमध्ये त्याच्या 'सरला एक कोटी' या आगामी चित्रपटाबाबत सांगितलं. तसेच या मुलाखतीमध्ये ओंकारला हास्यजत्रा सोडण्याचं कारण देखील विचारण्यात आलं.
काय म्हणाला ओंकार?
हास्यजत्रा सोडण्याचा निर्णय का घेतला? असा प्रश्न विचारल्यानंतर एबीपी माझाला दिलेल्या मुलाखतीमध्ये ओंकारनं सांगितलं, 'सगळं छान सुरु होतं, पण मला पुढे दोन चित्रपटांसाठी थांबायचं होतं. त्यांना पण अॅडजेस्टमेंट करावी लागणार होती. माझ्या प्रकृतीच्या पण काही तक्रारी होत्या. तेव्हा सुट्टी घेतली ती कायमचीच. नंतर मी फू बाई फू मध्ये काम केलं. मी या सगळ्यामधून शिकत आहे.'
'सरला एक कोटी' चित्रपटाबद्दल ओंकार म्हणाला, 'ही साध्या कुटुंबाची आणि साध्या माणसाची ही गोष्ट आहे. एक सिनेमा हा कालाकारांचा किंवा एका टीमचा नसतो. तो प्रेक्षकांचा देखील असतो. आपण सगळ्यांनी तो सिनेमा सेलिब्रेट केला पाहिजे. त्या सिनेमामधील कोणत्या गोष्टी आवडल्या, कोणत्या गोष्टी नाही आवडल्या, याबद्दल प्रतिक्रिया दिली पाहिजे कारण त्यामुळे सुधारणा होते. आपण सर्वांनी एकत्र राहिलं पाहिजे. सिनेमा कसा वाटला हे आम्हाला नक्की कळवा. '
'सरला एक कोटी' हा ओंकारचा चित्रपट 20 जानेवारी रोजी प्रेक्षकांच्या भेटीस येणार आहे. या सिनेमाची कथा, पटकथा लेखन आणि दिग्दर्शन सिंधुविजय सुपेकर यांनी केलं आहे. ओंकारसोबतच या चित्रपटात अभिनेत्री ईशा केसकर, छाया कदम हे कलाकार देखील प्रमुख भूमिका साकारणार आहेत. या चित्रपटाच्या ट्रेलरला प्रेक्षकांची पसंती मिळाली आहे. या चित्रपटाची प्रेक्षक उत्सुकतेने वाट बघत आहेत. बॉईज-2,बॉईज- 3, घे डबल यांसारख्या चित्रपटांमध्ये ओंकारनं काम केलं आहे. ओंकारच्या अभिनयाला त्याच्या चाहत्यांची पसंती मिळते.
वाचा इतर महत्वाच्या बातम्या:
महत्त्वाच्या बातम्या
