Marathi Serial : मृणाल दुसानिसचं दमदार कमबॅक, लग्नानंतर होईलच प्रेम मालिकेचा प्रोमो समोर;पण कोणती मालिका घेणार प्रेक्षकांचा निरोप?
Marathi Serial : अभिनेत्री मृणाल दुसानिसच्या नव्या मालिकेचा प्रोमो नुकताच स्टार प्रवाह वाहिनीवर शेअर करण्यात आला आहे.
Marathi Serial : मागील काही वर्ष पडद्यापासून ब्रेक घेतल्यानंतर आता अभिनेत्री मृणाल दुसानिस (Mrunal Dusanis) ही तिच्या कमबॅकसाठी सज्ज झालीये. नुकतच स्टार प्रवाह (Star Pravah) वाहिनीवर मृणालच्या या नव्या मालिकेचा प्रोमो शेअर करण्यात आला आहे. 'लग्नानंतर होईलच प्रेम' (Lagnanantar Hoilach Prem) ही मालिका येत्या 16 डिसेंबरपासून प्रेक्षकांच्या भेटीला येत आहे. या मालिकेत मृणाल दुसानिसोबत अभिनेत्री ज्ञानदा रामतीर्थकर, विजय आंदळकर आणि विवेक सांगळे हे कलाकारही मुख्य भूमिकेत आहेत. संध्याकाळी 7 वाजता ही मालिका प्रसारित करण्यात येणार आहे.
अनेक दिवसांपासून मृणालच्या या नव्या मालिकेची चर्चा सुरु होती. पण आता मोठ्या ब्रेकनंतर मृणाल प्रेक्षकांच्या भेटीस येत आहेत. त्यामुळे महाराष्ट्राच्या सोज्वळ आणि लाडक्या सुनेला पुन्हा एकदा टिव्हीवर पाहण्यासाठी प्रेक्षकही उत्सुक आहेत.त्याचप्रमाणे मालिकेची गोष्ट नेमकी काय असणार याचीही उत्सुकता प्रेक्षकांना आहे. लग्नानंतरच्या प्रेमाची ही गोष्ट कशी असणार हे पाहणं आता रंजक ठरेल.
मालिकेचा प्रोमो शेअर
मालिकेचा नवा प्रोमो नुकताच प्रेक्षकांच्या समोर आलेला आहे. यामध्ये विवेक सांगळे आणि ज्ञानदा या दोघांचं एकमेकांवर प्रेम असल्याचं दिसतंय. त्याचप्रमाणे मृणाल ही ज्ञानदाच्या ताईच्या भूमिकेत आहे तर विजय आंदळकर हा विवेकच्या भावाच्या भूमिकेत आहे. मृणाल आणि विजयचं त्यांच्या कुटुंबियांनी लग्न ठरवलंय. पण या लग्नाचा योग नाही असं गुरुजी त्यांना सांगतात. आता त्यांचे योग नक्की कुणासोबत जुळले आहेत, हे मालिकेत समजेलच. मालिकेचा प्रोमो शेअर करत कॅप्शनमध्ये म्हटलं की, भाग्याच्या ह्या अवखळ रेषा,कश्या जोडल्या गेल्या सांग.... नवी मालिका ‘लग्नानंतर होईलच प्रेम’ १६ डिसेंबरपासून,सोम-शनि सायं. 7:00 वाजता.
कोणती मालिका घेणार प्रेक्षकांचा निरोप?
स्टार प्रवाह वाहिनीवर काही महिन्यांपूर्वीच साधी माणसं ही मालिका सुरु झाली. अभिनेत्री शिवानी बावकर आणि अभिनेता आकाश नलावडे हे या मालिकेत मुख्य भूमिकेत आहेत. ही मालिका स्टार प्रवाह वाहिनीवर संध्याकाळी 7 वाजता प्रदर्शित करण्यात येते. तसेच ही नवी मालिकाही संध्याकाळी 7 वाजता प्रदर्शित केली जाणार आहे. त्यामुळे आता कोणती मालिका प्रेक्षकांचा निरोप घेणार याचीही उत्सुकता आहे.
View this post on Instagram
ही बातमी वाचा :
महत्त्वाच्या बातम्या
ट्रेंडिंग न्यूज
