Satluj Diljit Dosanjh Fees: अवघ्या 48 तासांत ओटीटीवरून हटवला; दिलजीत दोसांझने 'सतलज'साठी किती मानधन घेतलं? दिग्दर्शकानं सांगितला आकडा
पंजाबमधील अनेकांनी त्यासाठी प्रयत्न केले, पण यश आलं नाही, असंही त्यांनी नमूद केलं.
Satluj Diljit Dosanjh Fees: दिलजीत दोसांझचा 'सतलज' हा चित्रपट ओटीटीवर प्रदर्शित झाल्यानंतर अवघ्या 48 तासांत प्लॅटफॉर्मवरून हटवण्यात आला आणि त्यानंतर या चित्रपटाची जोरदार चर्चा सुरू झाली. सोशल मीडियावर चित्रपटासोबतच आता त्याचे दिग्दर्शक हनी त्रेहान यांचा एक व्हिडिओही मोठ्या प्रमाणात व्हायरल होत आहे. या व्हिडिओमध्ये त्यांनी चित्रपटासाठी दिलजीत दोसांझला कसं तयार केलं आणि त्याने या भूमिकेसाठी किती मानधन घेतलं, याबाबत खुलासा केला आहे.
'सतलज'साठी दिलजीतने किती घेतलं मानधन?
हनी त्रेहान यांनी सांगितलं की, 'सतलज' या चित्रपटातील भूमिका स्वीकारण्यासाठी दिलजीत दोसांझनी एकही रुपया मानधन मागितलं नव्हतं. ते म्हणाले "दिलजीत पाजींनी मला हात जोडून फक्त 'वाहेगुरू जी' असं म्हटलं आणि फक्त एवढंच विचारलं की, 'पाजी, मला सांगा... कधी यायचं आणि कुठे यायचं? तुम्ही फक्त वेळ आणि ठिकाण सांगा, मी तिथे येतो.' त्यांनी फीचा विषयच काढला नाही."
असा सुरू झाला चित्रपटाचा प्रवास
हनी त्रेहान यांनी पुढे सांगितलं की, त्यांनी दिलजीत दोसांझ यांना 1984 नंतरच्या पंजाबच्या पार्श्वभूमीवर चित्रपट बनवण्याची इच्छा व्यक्त केली होती. त्यावर दिलजीत म्हणाले की, "1984 नंतरच्या घटनांवर पूर्ण चित्रपट उभा करता येईल, अशा फार कमी कथा आहेत." त्यानंतर त्यांनी जसवंत सिंह खालडा यांचं नाव सुचवलं. मात्र त्यांच्या कुटुंबीयांकडून या कथेसाठी हक्क मिळणं खूप कठीण असल्याचंही त्यांनी सांगितलं. पंजाबमधील अनेकांनी त्यासाठी प्रयत्न केले, पण यश आलं नाही, असंही त्यांनी नमूद केलं.
संशोधन पुस्तक पाहताच दिला होकार
हनी त्रेहान यांनी सांगितलं की, त्यांच्याकडे त्या वेळी संशोधनासाठीचं एक पुस्तक होतं. त्या पुस्तकाच्या पहिल्याच पानावर जसवंत सिंह खालडा यांचा फोटो आणि 'JSK' अशी नोंद होती. ते पुस्तक दिलजीत यांना दाखवत त्यांनी, "मला जसवंत सिंह खालडा यांच्या आयुष्यावर चित्रपट बनवायचा आहे आणि त्यांची भूमिका तुम्ही साकारावी, अशी माझी इच्छा आहे," असं सांगितलं. हे ऐकल्यानंतर दिलजीत दोसांझ यांनी मानधनाची कोणतीही चर्चा न करता लगेच होकार दिला. त्यांनी हात जोडून "वाहेगुरू जी" असं म्हणत फक्त चित्रपटाच्या शूटिंगची तारीख आणि ठिकाण विचारलं, असा खुलासा हनी त्रेहान यांनी केला.
महत्त्वाच्या बातम्या
