'छत्रपती शिवरायांचा अवमान करण्याचा माझा किंचितही हेतू नव्हता...'; रितेश देशमुखचं 'राजा शिवाजी' सिनेमाच्या सक्सेस पार्टीतल्या 'त्या' व्हायरल व्हिडीओवर स्पष्टीकरण
Ritesh Deshmukh Clarification On Viral Video: 'राजा शिवाजी' सिनेमाच्या सक्सेस पार्टीच्या व्हायरल व्हिडीओवरुन रितेश देशमुखचं जोरदार ट्रोलिंग झालं. अशातच आता रितेश देशमुखनं पोस्ट शेअर करुन स्पष्टीकरण दिलं आहे.
Ritesh Deshmukh Clarification On Viral Video: रितेश देशमुख (Ritesh Deshmukh) दिग्दर्शित 'राजा शिवाजी' (Raja Shivaji Movie) सिनेमानं इतिहास घडवला असून बक्कळ गल्ला जमवला आहे. 'राजा शिवाजी' सिनेमानं भल्या भल्या दिग्गजांना गुडघे टेकायला भाग पाडलं. अशातच सिनेमाच्या अभूतपूर्व यशानंतर रितेश देशमुख यानं सिनेमाच्या टीमसाठी म्हणजेच, सिनेमासाठी झटलेल्या पडद्यावरच्या आणि पडद्यामागच्या कलाकारांसाठी छोट्या पार्टीचं आयोजन केलं होतं. या पार्टीत रितेश देशमुख 'राजा शिवाजी' सिनेमाचं टीशर्ट घालून आलेला. तसेच, पार्टीत डान्स करतानाचे व्हिडीओ सोशल मीडियावर व्हायरल झालेले. पण, जे कुणाच्या लक्षातही आलं नाही, तेच नेमकं नेटकऱ्यांनी हेरलं. पार्टीच्या व्हायरल व्हिडीओवरुन रितेश देशमुखचं जोरदार ट्रोलिंग झालं. अशातच आता रितेश देशमुखनं पोस्ट शेअर करुन स्पष्टीकरण दिलं आहे.
अभिनेता रितेश देशमुख नेमकं काय म्हणाला?
अभिनेता रितेश देशमुख म्हणाला की, "नुकत्याच प्रदर्शित झालेल्या 'राजा शिवाजी' चित्रपटाला प्रेक्षकांनी दिलेल्या अभूतपूर्व प्रतिसादाच्या आनंदानिमित्त आमच्या संपूर्ण टीमने एक छोटेखानी आनंदोत्सव आयोजित केला होता. त्यासंबंधाने माझा एक व्हिडिओ सध्या समाजमाध्यमांवर फिरत होता. एक शिवप्रेमी आणि प्रेक्षककुटुंब या नात्याने मी याचे स्पष्टीकरण देणे माझं कर्तव्य मानतो. मी नम्रपणे स्पष्ट करू इच्छितो की, छत्रपती शिवाजी महाराजांची प्रतिमा असलेला टी-शर्ट परिधान करून आनंद साजरा करण्यामागे त्यांचा अवमान करण्याचा माझा किंचितही हेतू नव्हता. तो टी-शर्ट मी चित्रपटाच्या प्रचारादरम्यान वापरत होतो. त्या दिवशीही मी प्रचारकार्य पूर्ण करून थेट कार्यक्रमात सहभागी झालो असल्याने टी-शर्ट बदलणे राहून गेले".
"मी आजवर कधीही मद्यपान केलेले नाही आणि भविष्यातही करणार नाही..."
पुढे रितेश देशमुखनं लिहिलंय की, "तसेच, माझ्याबाबत समाजमाध्यमांवर होत असलेल्या काही दाव्यांविषयीही स्पष्ट करू इच्छितो की, मी आजवर कधीही मद्यपान केलेले नाही आणि भविष्यातही करणार नाही. त्यामुळे या संदर्भातील कोणतेही आरोप वस्तुस्थितीला धरून नाहीत. विशेष म्हणजे, हा व्हिडिओ चित्रित करणाऱ्या व्यक्तीला संबंधित कार्यक्रमाचे निमंत्रणदेखील देण्यात आलेले नव्हते. ह्या कार्यक्रमाचे आयोजन 'राजा शिवाजी' या चित्रपटासाठी साडेतीन वर्षे अथक परिश्रम घेतलेल्या, कॅमेरामागील आणि कॅमेरासमोरील सर्व कलावंत व सहकाऱ्यांप्रती कृतज्ञता व्यक्त करण्यासाठी करण्यात आले होते. तथापि, माझ्या त्या कृतीमुळे कुणाच्याही भावना दुखावल्या गेल्या असतील, तर एक शिवप्रेमी म्हणून मी मनःपूर्वक दिलगिरी व्यक्त करतो..."
"छत्रपती शिवाजी महाराज हे आपल्या सर्वांच्या श्रद्धेचे, प्रेरणेचे आणि स्वाभिमानाचे प्रतीक आहेत. त्यांच्याविषयी माझ्या मनात अत्यंत आदर, प्रेम आणि निष्ठा आहे. ही भावना आजही तितकीच दृढ आहे आणि कायम राहील. जय शिवराय आपला, रितेश विलासराव देशमुख", असं पुढे रितेश देशमुख यानं आपल्या पोस्टमध्ये म्हटलंय.
महत्त्वाच्या इतर बातम्या :
ABP माझाच्या बातम्या LIVE...
महत्त्वाच्या बातम्या
