KGF Chapter 2 Teaser | धमाकेदार अॅक्शनसह बहुप्रतिक्षित 'केजीएफ 2'चा टीझर प्रदर्शित

KGF Chapter 2 Teaser 'केजीएफ' या चित्रपटाच्या पहिल्या भागाला मिळालेली कमालीची लोकप्रियता पाहता या चित्रपटाच्या दुसऱ्या भागाबाबतही प्रेक्षकांमध्ये उत्सुकता आणि कुतूहल कायम असेल ही बाब स्पष्ट होती.

KGF Chapter 2 Teaser 'केजीएफ' या चित्रपटाच्या पहिल्या भागाला मिळालेली कमालीची लोकप्रियता पाहता या चित्रपटाच्या दुसऱ्या भागाबाबतही प्रेक्षकांमध्ये उत्सुकता आणि कुतूहल कायम असेल ही बाब स्पष्ट होती. असंच चित्र पाहायला मिळालं आणि अखेर याच उत्साही वातावरणात या चित्रपटाच्या दुसऱ्या भागाचा टीझर प्रेक्षकांच्या भेटीला आला.

ठरलेल्या तारखेच्या एक दिवस आधीच म्हणजेच अभिनेता यश याच्या वाढदिवसाआधीच टीझर प्रेक्षकांच्या भेटीला आला. चाहत्यांमध्ये चित्रपटासाठीची असणारी उत्सुकता पाहता हा निर्णय़ घेतला गेल्याचं म्हटलं जात आहे. टीझर प्रदर्शित होताच सोशल मीडियावर तो क्षणार्थातच ट्रेंडमध्ये आला.

होमबेल युट्यूब चॅनलवर हा टीझर प्रदर्शित करण्यात आला. ज्यामध्ये 'रॉकी' आणि त्याच्या आईचं नातं आणि गतकाळातील काही दृश्य पाहायला मिळत आहेत. रॉकीचं त्याच्या आईनं कशा प्रकारे संगोपन केलं, त्याची कशी काळजी घेतली, तो कशा पद्धतीनं मोठा झाला आणि आता आपण दिलेलं वचन तो पूर्ण करत आहे, याचीच झलक टीझरच्या काही मिनिटांच्या व्हिडीओमध्ये पाहायला मिळत आहे.

पाहा या चित्रपटाचा टीझर...

अभिनेत्री रवीना टंडन या चित्रपटामध्ये एक राजकीय व्यक्तिरेखा साकारताना दिसत आहे. तर, संजय दत्तनं साकारलेल्या 'अधीरा'च्या लूकवरुन मात्र अद्यापही पडदा उचलण्यात आलेला नाही. अभिनेता यश यामध्ये धमाकेदार अॅक्शन करताना दिसत आहे. साहसदृश्य., भावभावना आणि प्रभावी संवाद यांचा मिलाप या टीझरमध्ये पाहायला मिळत आहे. यशचा एकंदर लूक आणि अंदाज पाहता चाहते त्याच्यावर खऱ्या अर्थानं भाळले आहेत. तेव्हा आता या चित्रपटाला प्रेक्षक किती पसंती देतात आणि पहिल्या भागानं रचलेले विक्रम तो मोडित काढतो का, हे पाहणं महत्त्वाचं ठरणार आहे.

दरम्यान अद्यापही या चित्रपटाच्या प्रदर्शनाची तारीख जाहीर करण्यात आलेली नाही. 'केजीएफ चॅप्टर 2'मध्ये संजय दत्त, यश, रवीना टंडन, श्रीनिधी शेट्टी, प्रकाश राज यांसारखे लोकप्रिय कलाकार झळकणार आहेत.