Rashmi Desai Birthday : अभिनेत्री रश्मी देसाई (Rashmi Desai) ही तिच्या बोल्ड आणि बिनधास्त स्टाईलसाठी ओळखली जाते. टीव्हीवरील सर्वाधिक मानधन घेणाऱ्या अभिनेत्रींमध्ये समाविष्ट असलेली रश्मी देसाई आज (13 फेब्रुवारी) तिचा 36वा वाढदिवस साजरा करत आहे. ‘बिग बॉस’च्या सीझन 13मध्ये रश्मी देसाईने तिच्या बेधडक स्वभावाने चाहत्यांची मने जिंकली होती.


रश्मीचा जन्म 13 फेब्रुवारी 1986 रोजी आसाममध्ये झाला. रश्मीने आपल्या फिल्मी करिअरची सुरुवात एका आसामी सिनेमातून केली होती. मात्र, या चित्रपटात अतिशय लहान पात्र असल्यामुळे रश्मी लोकांच्या नजरेतही येऊ शकली नाही. रश्मीने छोट्या पडद्यापासून भोजपुरी सिनेमापर्यंत आपल्या अभिनयाचा जलवा बिखेरला आहे. केवळ भोजपुरी आणि आसामीच नाही, तर रश्मीने गुजराती आणि मराठी सिनेमांमध्येही काम केले आहे.


‘रावण’मधून करिअरची सुरुवात


रश्मीने 2006 मध्ये झी टीव्हीच्या 'रावण' या मालिकेमधून तिच्या करिअरची सुरुवात केली होती. कलर्सच्या 'उतरन' शोमधून रश्मीला छोट्या पडद्यावर मोठी ओळख मिळाली. या टीव्ही शोमुळे रश्मीला घरोघरी ओळख मिळाली होती. ‘उतरन’मुळे रश्मी 'तपस्या' म्हणून प्रसिद्ध झाली. रश्मीने 'दिल से दिल तक', 'इश्क का रंग सफेद', 'अधुरी कहानी हमारी', 'नच बलिए 7' आणि 'खतरों के खिलाडी 6' सारख्या शोमध्ये देखील काम केले आहे.


‘बिग बॉस’मधून मिळाली ओळख


रश्मीच्या करिअरचा आलेख उंचावण्याचे काम ‘बिग बॉस’ने केले. या शोमध्ये आल्यानंतर रश्मीची एक नवीन शैली प्रेक्षकांसमोर आली, जी चाहत्यांना खूप आवडली. शोमध्ये रश्मी तिच्या वैयक्तिक आयुष्यामुळेही चर्चेत होती. वास्तविक, रश्मीने तिचा को-स्टार नंदिश संधूसोबत लग्न केले, पण हे नाते फार काळ टिकले नाही. लग्नानंतर काही काळातच दोघांचा घटस्फोट झाला. यानंतर रश्मीच्या आयुष्यात अरहान खान आला, पण अरहान खानने बिग बॉसमध्ये असे काही खुलासे केले, ज्यामुळे रश्मी आणि अरहानचे नातेही संपुष्टात आले.


सिद्धार्थसोबतचा वाद चर्चेत!


‘बिग बॉस’मध्ये सिद्धार्थ शुक्लासोबतच्या नात्यामुळे देखील रश्मी देसाईही चर्चेत होती. या शोमध्ये दोघांमध्ये खूप भांडण झाले होते. रश्मी देसाई आणि सिद्धार्थ शुक्ला 'दिल से दिल तक' या टीव्ही शोमध्ये मुख्य भूमिकेत होते. सुरुवातीला दोघांमध्ये चांगले संबंध होते, पण हळूहळू त्यांच्यात भांडण सुरू झाले. त्याचवेळी हे प्रकरण इतके वाढले की, दोघांनी एकमेकांशी बोलणे बंद केले. त्याचा परिणाम त्यांच्या पडद्यावरच्या केमिस्ट्रीमध्येही दिसू लागला होता. त्यामुळे शोच्या निर्मात्यांनी सिद्धार्थच्या रिप्लेस करण्याचा देखील विचार केला होता.


हेही वाचा :



LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha