नवीन लग्न, नवं घर; गौरव मोरेच्या आनंदाच्या क्षणी हास्यजत्रेचे चेहरेच अनुपस्थित; गैरहजेरीमागचं कारण समोर
हास्यजत्रेतील कलाकारांनी गौरवच्या आयुष्यातील आनंदाच्या क्षणी पाठ फिरवली का? असा प्रश्न सोशल मिडीयावर विचारला जात असताना कलाकारांच्या उपस्थितीचे कारण समोर आले आहे.
Gaurav More: महाराष्ट्राची हास्यजत्रा कार्यक्रमातून घराघरात लोकप्रीय झालेला 'फिल्टरपाड्याचा बच्चन' गौरव मोरे (Gaurav More) सध्या चर्चेत आहे तो त्याच्या नवीन घरामुळे आणि सरप्राइज लग्नाच्या बातमीमुळे. आपल्या आगळ्या वेगळ्या स्टाईलने प्रेक्षकांना हसवणारा गौरव आपल्या आयुष्याची नवी इनिंग सुरु करतोय. नवीन घर आणि जोडीदारासोबत केलेल्या गृहप्रवेशाची चर्चा असतानाच त्याच्या डबल सेलिब्रेशनमध्ये हस्याजात्रेतल्या चेहऱ्यांची अनुपस्थिती चाहत्यांना जाणवली. मुंबईत हक्काचं घर घेतलं, लग्न केलं पण हास्यजत्रेतील कलाकारांनी गौरवच्या आयुष्यातील आनंदाच्या क्षणी पाठ फिरवली का? असा प्रश्न सोशल मिडीयावर विचारला जात असताना कलाकारांच्या उपस्थितीचे कारण समोर आले आहे.
हास्यजत्रेचे कलाकार का होते अनुपस्थित?
गौरवच्या लग्नात, नव्या घराच्या गृहप्रवेशावेळी कुठेही गौरवची हास्यजत्रेतील पलटण दिसली नाही. समीर चौगुले, वनिता खरात, नम्रता संभेराव, शिवाली परब ज्यांनी गौरवसोबत वर्षानुवर्ष प्रेक्षकांना हसवलं ते कलाकार गौरवने शेअर केलेल्या कुठल्याही फोटोमध्ये दिसले नाहीत. त्यांनी स्टोरीही शेअर केली नाही. त्यामुळे चाहत्यांच्या मनात शंकेची पाल चुकचुकली. पण आता हास्यजत्रेतील कलाकारांच्या गैरहजेरीचे कारण समोर आले आहे.
मिळालेल्या माहितीनुसार, गौरवचं घर झालं त्यावेळी आणि लग्नाच्या वेळी हास्यजत्रेची टीम ऑस्ट्रेलिया दौऱ्यावर होती. शिवाली, वनिता, पृथ्विक प्रताप आणि समीर हे सर्वजण परदेशात त्यांचे शो सुरु असल्यामुळे व्यस्त होते. तर नम्रता संभेराव, प्रसाद खांडेकर, ओमकार राऊत सध्या त्यांच्या नाटकाच्या प्रयोगासाठी अमेरिका दौऱ्यावर आहेत. पण भारतात परतल्यानंतर चाहत्यांना नक्कीच या कलाकारांकडून गौरवचं कौतुक ऐकायला मिळेल यात शंका नाही.
गौरवची पत्नी प्रियांका कारेकर आहे तरी कोण?
गौरव मोरेनं त्याच्या प्रेयसीशी लग्न केलं असल्याची माहिती आहे. गौरवची अत्यंत जवळची मैत्रिण ऋतुजा बागवे हिनं आपल्या इन्स्टाग्रामवर पोस्ट शेअर केली होती. या पोस्टमध्ये ऋतुजासोबत गौरव मोरे आणि त्याची पत्नी दिसत आहे. या पोस्टला तिनं, 'मिस्टर अँड मिसेस मोरे' असं कॅप्शन दिलं आहे. या पोस्टमधून गौरवनं लग्न केलं असल्याचं उघड झालं. प्रियांका कारेकर असं गौरव मोरेच्या पत्नीचं नाव आहे. ती केवळ गौरवची पत्नी नसून, सिने इंडस्ट्रीतील एक ओळखीचा चेहरा देखील आहे. माहितीनुसार, गौरव मोरेची पत्नी उत्तम अभिनेत्री असून, तिनं अनेक प्रोजेक्टसाठी काम केलं आहे. तिनं आपल्या कारकिर्दीत साऊथ इंडस्ट्रीतही काम केलं असल्याची माहिती आहे. तिनं साऊथ इंडस्ट्रीतील कलाकार दुलकर सलमानसोबत एका सिनेमासाठी स्क्रीन शेअर केली असल्याची माहिती आहे. तिनं आपल्या पोस्टमधून साऊथ इंडस्ट्रीतील बड्या कलाकारासोबत स्क्रीन शेअर करतानाचा अनुभव शेअर केला आहे.
महत्त्वाच्या बातम्या
