Free Hit Danka : 'फँड्री' मधील जब्याचा 'फ्री हिट दणका' ; ट्रेलर प्रदर्शित

अभिनेता  सोमनाथ अवघडे च्या 'फ्रँड्री' (Fandry) या चित्रपटातील जब्या या भूमिकेला प्रेक्षकांची पसंती मिळाली होती.

Free Hit Danka

Free Hit Danka : अभिनेता  सोमनाथ अवघडे च्या 'फ्रँड्री' (Fandry) या चित्रपटातील जब्या या भूमिकेला प्रेक्षकांची पसंती मिळाली होती. लवकरच त्याचा  'फ्री हिट दणका' (Free Hit Danka) हा चित्रपट प्रेक्षकांच्या भेटीस येणार आहे. काही दिवसांपूर्वी 'फ्री हिट दणका' चित्रपटाचा टिझर प्रदर्शित झाला. नुकताच या चित्रपटाचा ट्रेलर देखील प्रदर्शित झाला. या चित्रपटाचा ट्रेलर पाहून प्रेक्षकांमध्ये चित्रपटाबद्दल उत्सुकता निर्माण झाली आहे. 

ग्रामीण कथा, क्रिकेट, उत्तम संवाद, जबरदस्त अभिनय या सर्व गोष्टींमुळे या चित्रपटाचा ट्रेलर सगळीकडे गाजत आहे. चित्रपटाचा ट्रेलर जसाजसा पुढे जातो तशीतशी चित्रपटाबद्दल उत्कंठा वाढत जाते.  उघडेवाडी गावातील धुमाकूळ पाटील आणि निगडेवाडी गावातील अण्णा पाटील या दोन पाटील घराण्यांमध्ये वैमनस्य असून धुमाकूळ पाटीलाच्या मुलाचे अण्णा पाटीलांच्या मुलीवर प्रेम असल्याचे ट्रेलरमध्ये दिसत आहे. आता या दोघांच्या प्रेमाचे भविष्य या दोन गावांमध्ये दरवर्षी भरवल्या जाणाऱ्या क्रिकेटच्या स्पर्धेवर अवलंबून आहे. या दोघांचे प्रेम कसे जुळते? त्यांच्या प्रेमाचे पुढे नक्की काय होते? या दोन गावांमध्ये नक्की कोणत्या कारणामुळे वैमनस्य आहे? या सगळ्या प्रश्नांच्या उत्तरासाठी प्रेक्षकांना 17 डिसेंबरपर्यंत वाट पाहावी लागणार आहे. 

'फँड्री' फेम सोमनाथ अवघडे सोबत या चित्रपटात अपूर्वा एस देखील प्रमुख भूमिकेत दिसणार आहे. विशेष म्हणजे 'सैराट' चित्रपटातील सुपरहिट जोडी अरबाज (सल्या) आणि तानाजी (लंगड्या) तसेच सुरेश विश्वकर्मा, अनिल नगरकर, गणेश देशमुख हे देखील या चित्रपटात प्रमुख भूमिका साकारणार आहेत. आकाश अलका बापू ठोंबरे, मेघनाथ गुरुनाथ सोरखडे आणि सुनिल मगरे यांनी चित्रपटाची निर्माती केली आहे. तर नितीन बापू खरात, सुधाकर लोखंडे यांनी सहनिर्मात्यांची धुरा सांभाळली आहे. एसजीएम फिल्म्स प्रस्तुत 'फ्री हिट दणका' या चित्रपटाचे लेखन आणि संवाद संजय नवगीरे यांचे आहेत.