Vashu Bhagnani : अक्षय कुमारच्या फ्लॉप चित्रपटामुळे ऑफिस विकावं लागलं? निर्मात्याने अखेर मौन सोडलं, म्हणाले...

Vashu Bhagnani : काही दिवसांपूर्वीच अक्षय कुमारच्या फ्लॉप चित्रपटाचा फटका बसल्याने निर्माते वासू भगनानी यांनी आपले कर्ज फेडण्यासाठी ऑफिसची इमारत विकली असल्याचे वृत्त समोर आले होते. त्यावर आता वासू भगनानी यांनी मौन सोडले आहे.

Vashu Bhagnani breaks silence On Akshay Kumar Flop Movie

Vashu Bhagnani : बॉलिवूडचा खिलाडी अभिनेता अक्षय कुमार (Akshay Kumar) याच्या चित्रपटांची सध्या वाईट स्थिती आहे. अक्षय कुमारचे चित्रपट बॉक्स ऑफिसवर फारशी चमकदार कामगिरी करत नाही. याचा फटका निर्मात्यांना बसत आहे. काही दिवसांपूर्वीच अक्षय कुमारच्या फ्लॉप चित्रपटाचा फटका बसल्याने निर्माते वासू भगनानी (Vashu Bhagnani) यांनी आपले कर्ज फेडण्यासाठी ऑफिसची इमारत विकली असल्याचे वृत्त समोर आले होते. त्यावर आता वासू भगनानी यांनी मौन सोडले आहे. आपण ऑफिसची इमारत विकली नसून त्याचा पुनर्विकास होत असल्याचे त्यांनी स्पष्ट केले.

'टाइम्स ऑफ इंडिया'शी बोलताना वासू भगनानी यांनी या अफवेवर मौन सोडले. कर्जबाजारी झाल्याने काहींचे पैसे देखील थकले असल्याचे वृत्त समोर आले होते. त्यावर बोलताना वासू भगनानी यांनी म्हटले की, 'मी गेल्या 30 वर्षांपासून या व्यवसायात आहे. मी पैसे दिले नसल्याचा दावा करणारे काही लोक असतील तर त्यांनी पुढे येऊन आमच्याशी चर्चा करावी. पूजा एंटरटेनमेंटसोबत त्यांचा करार झाला होता का, त्यांच्याकडे आमची काही थकबाकी असेल तर त्यांनी काही तक्रार दाखल केली का? असा उलट प्रश्न करत काही गोष्टी दुरुस्त करण्याचे अनेक मार्ग आहेत असेही त्यांनी म्हटले. 

काही तक्रार असेल माझ्या कार्यालयात येऊन बोला...

वासू भगनानी यांनी पुढे म्हटले की, 'जर कोणाला काही अडचण वाटत असेल तर त्यांनी आमच्याशी बोलावं, माझ्या ऑफिसमध्ये यावे असेही त्यांनी म्हटले. तुमचे काही पैसे अडकले असतील तर आम्हाला करार आणि इतर संबंधित कागदपत्रे द्या आणि काही गोष्टी ठीक करण्यासाठी 60 दिवसांचा अवधी द्या असे आवाहन वासू भगनानी यांनी केले. आम्ही सध्या ब्रिटनमधील एका प्रोडक्शन कंपनीसोबत काम करत आहोत. जर कोणाची थकबाकी असेल तर त्यांनी आमच्याशी थेट संपर्क साधावा असेही त्यांनी म्हटले. 

पूजा एंटरटेन्मेंटचे ऑफिस विकलं नाही...

कर्जाच्या डोंगरामुळे पूजा एंटरटेन्मेंटचे ऑफिस विकलं गेल्याच्या चर्चेवरही वासू भगनानी यांनी मौन सोडले. त्यांनी सांगितले की, ऑफिसच्या जागेचा पुनर्विकास केला जात आहे. त्याचे नियोजन वर्षभरापूर्वी करण्यात आले होते. आता 'बडे मियाँ छोटे मियाँ' रिलीज झाल्यानंतर पुनर्विकासाच्या कामाला सुरुवात झाली आहे. 

वासू भगनानी यांनी म्हटले की, हिट आणि फ्लॉप चित्रपट  हा व्यवसायाचा एक भाग आहेत. आम्ही आधीपासून एका प्रोजेक्टवर काम करत आहोत. हा प्रोजेक्ट एक भव्य अॅनिमेशन सीरिज असल्याची माहिती भगनानी यांनी दिली.  वासू भगनानी हे रितेश देशमुखचा भाऊ धीरज देशमुख याचे सासरे आहे. वासू भगनानी यांची कन्या आणि जॅकी भगनानी यांची बहीण पूजा हिचा विवाह धीरजसोबत झाला आहे.