Nagraj Manjule Naal 2 Song Out : नागराज मंजुळेंच्या (Nagraj Manjule) 'नाळ 2' (Naal 2) या सिनेमाची प्रेक्षकांना उत्सुकता आहे. लवकरच हा सिनेमा प्रदर्शित होईल. या सिनेमातील 'भिंगोरी' (Bhingori) हे गाणं काही दिवसांपूर्वी प्रेक्षकांच्या भेटीला आलं होतं. आता या सिनेमातील 'डराव डराव' (Darav Darav) हे दुसरं गाणं प्रेक्षकांच्या भेटीला आलं आहे.
सुधाकर रेड्डी यंकट्टी दिग्दर्शित 'नाळ 2'मधील 'डराव डराव' गाणे ऐकले का? अर्थात हे बच्चे कंपनीवर चित्रित करण्यात आलेले गाणे मोठ्यांनाही आवडेल असे आहे. चैतू, चिमू आणि मणी यांची धमाल असलेल्या या गाण्याचे बोल वैभव देशमुख यांचे असून या गाण्याला ए. व्ही. प्रफुल्लचंद्रा यांनी संगीत दिले आहे. तर या जबरदस्त गाण्याला जयेश खरे आणि मास्टर अवन यांचा आवाज लाभला आहे.
'नाळ' या सिनेमातील गाण्यांनी प्रेक्षकांना वेड लावले होते. आता 'नाळ 2' मधील गाणीही प्रेक्षकांच्या पसंतीस येत आहेत. या गाण्याची खासियत म्हणजे या गाण्याला लाभलेला नवोदित गायकाचा आवाज. मुळात नागराज मंजुळे हे आपल्या सिनेमांमध्ये नेहमीच नवोदितांना संधी देतात आणि हे कलाकार या संधीचे सोने करतात. सारेगमपमध्ये जयेश स्पर्धक आहे आणि तिथेच या सर्वांनी त्याला हेरले. खरं तर जयेश खरेने अल्पावधीतच स्वतःची एक वेगळी ओळख निर्माण केली आहे.
चिमूने वेधलं लक्ष...
'डराव डराव' या गाण्यात विशेष लक्ष वेधून घेत आहे ती चिमुकली चिमू. एवढीशी गोड मुलगी तिच्या भावंडांसोबत धमाल करत आहेत. तिच्यातील हा गोडवा, निरागसता भावणारी आहे. ‘आई मला खेळायला जायचंय’ सारखेच हे गाणेही प्रेक्षकांना बालपणात रमवेल. आता या गाण्यामुळे ‘नाळ 2’ बघण्याची उत्सुकता अधिकच वाढली आहे. 'नाळ 2' हा सिनेमा 10 नोव्हेंबर 2023 रोजी सिनेमागृहात प्रदर्शित होणार आहे.
‘नाळ 2’मधील गाण्याबद्दल बोलताना नागराज मंजुळे म्हणाले,"आपल्या आजूबाजूला अशा अनेक व्यक्ती आहेत ज्यांच्यात कला दडलेली असते. बऱ्याचदा ती आपल्या नजरेत येत नाही. त्यामुळे मी अशा कलाकारांना नेहमीच संधी देतो. त्यांना प्रकाशझोतात आणण्याचा प्रयत्न करतो. विशेष म्हणजे आजवर माझी ही निवड नेहमीच योग्य ठरली आहे. अर्थात हे त्या कलाकारांचे यश. जयेश खरे त्यातलाच एक कलाकार. जयेशच्या आवाजात जादू आहे, हे आपल्या सर्वांनाच माहित आहे. त्याच्या या जादुई आवाजाने या गाण्यातूनही भावना व्यक्त होत आहेत".
संबंधित बातम्या