ज्येष्ठ अभिनेते जावेद खान अमरोही यांचे निधन; लगान, चक दे इंडिया चित्रपटात साकारली होती भूमिका
लगान आणि चक दे इंडिया या चित्रपटांमधील जावेद (Javed Khan Amrohi) यांच्या अभिनयाला प्रेक्षकांची विशेष पसंती मिळाली.त्यांच्या निधनानं चित्रपटसृष्टीवर शोककळा पसरली आहे.
Javed Khan Amrohi: अभिनेते जावेद खान अमरोही (Javed Khan Amrohi) यांचे निधन झाले आहे. त्यांच्या निधनानं चित्रपटसृष्टीवर शोककळा पसरली आहे. जावेद खान अमरोही यांनी अनेक हिट चित्रपटांमध्ये काम केलं. त्यांनी जवळपास 150 चित्रपटांमध्ये काम केलं. लगान (Lagaan) आणि चक दे इंडिया या चित्रपटांमुळे जावेद यांना विशेष लोकप्रिता मिळाली. तसेच 'वन्स अपॉन अ टाइम' आणि 'अंदाज अपना-अपना' या चित्रपटांमध्ये देखील त्यांनी काम केलं.
मालिका आणि चित्रपटांमध्ये साकारली भूमिका
दोन वर्षापूर्वी रिलीज झालेल्या सडक-2 या चित्रपटामध्ये जावेद खान अमरोही यांनी काम केलं होतं. या चित्रपटात त्यांनी पाक्या ही भूमिका साकारली होती. या चित्रपटात अभिनेता आलिया भट्ट, संजय दत्त आणि आदित्य रॉय कपूर यांनी देखील प्रमुख भूमिका साकारली. त्याच बरोबर जावेद खान अमरोही यांनी काही मालिकांमध्ये देखील काम केलं. ते इप्टाचे (इंडियन पीपल्स थिएटर्स असोसिएशन) सक्रिय सदस्य होते. फिर हेरा फेरी या चित्रपटामध्ये देखील त्यांनी काम केलं होतं. तसेच मिर्झा गालिब,कुछ भी हो सक्ता है, नुक्कड या मालिकांमध्ये देखील त्यांनी महत्वाची भूमिका साकारली होती. 1993 मध्ये रिलीज झालेल्या हम है राही प्यार के या चित्रपटामध्ये त्यांनी काम केलं होतं. चक दे इंडिया या चित्रपटामध्ये त्यांनी साकारलेल्या सुखलाल या भूमिकेचं अनेकांनी कौतुक केलं. जावेद खान अमरोही हे त्यांच्या अभिनयानं प्रेक्षकांचे मनोरंजन करत होते.
अखिलेश मिश्रा यांनी शेअर केली पोस्ट
अभिनेते अखिलेश मिश्रा यांनी सोशल मीडियावर पोस्ट शेअर करुन जावेद खान अमरोही यांना श्रद्धांजली वाहिली. या पोस्टमध्ये त्यांनी लिहिलं, 'जावेद खान साहेबांना श्रद्धांजली. महान अभिनेते, ज्येष्ठ कलाकार आणि इप्टाचे सक्रिय सदस्य' अखिलेश मिश्रा यांनी लगान या चित्रपटात जावेद खान अमरोही यांच्यासोबत काम केले.
जावेद यांना गेल्या काही दिवसांपासून श्वास घेण्यास त्रास होत होता. गेल्या एक वर्षापासून ते अंथरुणाला खिळून होते. त्यांना सांताक्रूझ येथील सूर्य नर्सिंग होममध्ये दाखल करण्यात आलं होतं. या रुग्णालयात त्यांनी अखेरचा श्वास घेतला. त्यांचे दोन्ही फुफ्फुस निकामी झाले होते. ओशिवारा येथे त्यांच्यावर अंत्यसंस्कार होतील.
वाचा इतर महत्वाच्या बातम्या:
महत्त्वाच्या बातम्या
