Kantara: बॉक्स ऑफिसवर ‘कांतारा’चं वादळ सुसाट! बिग बजेट चित्रपटांनाही टाकले पिछाडीवर
Kantara : साऊथ चित्रपट ‘कांतारा’ (Kantara) सध्या बॉक्स ऑफिसवर चांगलाच धुमाकूळ घालत आहे. कन्नड भाषेत रिलीज झालेला हा चित्रपट आता हिंदीसह इतर अनेक भाषांमध्ये प्रेक्षकांच्या भेटीला आला आहे.
Kantara : साऊथ चित्रपट ‘कांतारा’ (Kantara) सध्या बॉक्स ऑफिसवर चांगलाच धुमाकूळ घालत आहे. कन्नड भाषेत रिलीज झालेला हा चित्रपट आता हिंदीसह इतर अनेक भाषांमध्ये प्रेक्षकांच्या भेटीला आला आहे. बॉक्स ऑफिसवरही या चित्रपटाची जादू पाहायला मिळत आहे. या चित्रपटाने कमाईचे अनेक विक्रम रचले आहेत. या चित्रपटाने अनेक बिग बजेट चित्रपटांना पिछाडीवर टाकले आहे. बॉक्स ऑफिसवर कोट्यवधींचा गल्ला जमवत या चित्रपटाने किच्चा सुदीपचा ‘विक्रांत रोणा’ आणि दिवंगत अभिनेता पुनीत यांच्या ‘जेम्स’ला देखील मागे टाकले आहे.
‘कांतारा’ या चित्रपटाच्या कमाईमध्ये सातत्याने वाढ होताना दिसत आहे. लवकरच हा चित्रपट 200 कोटींच्या क्लबमध्ये पोहोचेल, अशी शक्यता देखील वर्तवली जात आहे. मीडिया रिपोर्टनुसार, ‘कांतारा’ हा चित्रपट 30 सप्टेंबर’ला थिएटरमध्ये रिलीज झाला होता. तेव्हापासूनच या चित्रपटाच्या कमाईचा आलेख हा चढताच आहे. रिलीजच्या 20 दिवसांत या चित्रपटाने 170 कोटींचा टप्पा पार केला आहे.
साऊथच्या सुपरस्टार्सना टाकले मागे!
भारतीय बॉक्स ऑफिसवरही या चित्रपटाचे कलेक्शन चांगले झाले आहे. भारतात या चित्रपटाने 150 कोटींची कमाई केल्याचे बोलले जात आहे. हे कलेक्शन पाहता या चित्रपटाने बिग बजेट चित्रपटांना देखील मागे टाकल्याचे लक्षात येते. साऊथ स्टार किच्चा सुदीप याच्या ‘विक्रांत रोणा’ या चित्रपटाने 158 कोटींची कमाई केली होती. तर, साऊथचा दिवंगत अभिनेता पुनीत यांचा शेवटचा चित्रपट ‘जेम्स’ने देखील बॉक्स ऑफिसवर 151 कोटींची कमाई केली होती. या चित्रपटांना मात देत ‘कांतारा’ने साऊथच्या ‘टॉप 3’ चित्रपटांमध्ये स्थान मिळवले आहे. या यादीत ‘केजीएफ’ आणि ‘केजीएफ 2’ हे दोन्ही चित्रपट पहिल्या दोन जागांवर स्थिर आहेत.
हिंदी व्हर्जनलाही मिळतेय जोरदार पसंती
अवघ्या 16 कोटींमध्ये बनलेला ‘कांतारा’ हा चित्रपट सध्या साऊथच नव्हे तर, हिंदीमध्येही धुमाकूळ घालत आहे. ‘कांतारा’ हा चित्रपट 14 ऑक्टोबर रोजी हिंदीमध्येही प्रदर्शित झाला आहे. या चित्रपटाने हिंदीतही 11कोटींहून अधिकची कमाई केली आहे. आधी हा चित्रपट फक्त कन्नड भाषेत प्रदर्शित झाला होता, पण नंतर चित्रपटाला मिळालेले अफाट यश पाहून निर्मात्यांनी तमिळ, हिंदी आणि तेलुगू भाषांमध्येही त्याचे डबिंग केले. इतर भाषांमध्ये रिलीज झाल्यानंतर ‘कांतारा’च्या कमाईत वाढ झाली आहे. चित्रपटाची कन्नड आवृत्ती ब्लॉकबस्टर ठरली आणि आता इतर भाषांमध्येही या चित्रपटाने आपली चुणूक दाखवली आहे.
वाचा इतर महत्त्वाच्या बातम्या:
महत्त्वाच्या बातम्या
