Raanbaazaar : बिग बजेट ‘रानबाजार’चा ट्रेलर प्रदर्शित; 20 मे ला येणार प्रेक्षकांच्या भेटीला

Raanbaazaar : ‘रानबाजार’ ही वेब सीरिज 20 मे पासून प्रेक्षकांच्या भेटीला येणार आहे.

रानबाजार

Raanbaazaar : बिग बजेट ‘रानबाजार’ (Raanbaazaar) या वेब सीरिजचा ट्रेलर नुकताच प्रदर्शित झाला आहे. अभिजित पानसे लिखीत, दिग्दर्शित ‘रानबाजार’ या वेब सीरिजच्या टीझरने सोशल मीडियावर चांगलाच धुमाकूळ घातला होता. या बोल्ड टिझरची सर्वत्र चर्चा रंगल्यानंतर आता ‘रानबाजार’चा जबरदस्त ट्रेलर प्रेक्षकांच्या भेटीला आला आहे. 

‘रानबाजार’च्या टीझरमध्ये तेजस्विनी पंडीत आणि  प्राजक्ता माळीचा बोल्ड अंदाज प्रेक्षकांना पाहायला मिळाला आहे. आता ट्रेलरदेखील प्रेक्षकांच्या पसंतीस उतरत आहे. या वेबसीरिजमध्ये उर्मिला कोठारे, मोहन आगाशे, मोहन जोशी, मकरंद अनासपुरे, सचिन खेडेकर, वैभव मांगले, अनंत जोग, सुरेखा कुडची, अभिजित पानसे, गिरीष दातार, निलेश दिवेकर, श्रेयस राजे, अतुल काळे, वनिता  खरात आणि माधुरी पवार यांच्या मुख्य भूमिका आहेत. 

पॅलिटिकल क्राईम थ्रिलर असलेल्या या वेबसीरिजची निर्मिती प्लॅनेट मराठी, अ व्हिस्टास मीडिया कॅपिटल कंपनी, रावण फ्युचर प्रॅाडक्शन, अभिजीत पानसे आणि अनिता पालांडे यांनी केली असून ही भव्य वेबसीरिज प्रेक्षकांना 20 मे पासून पाहायला मिळणार आहे. आजवर कधीही न पाहिलेले राजकारण, त्यातील धूर्त डावपेच, हनी ट्रॅप, उत्कंठा, नाट्यमय थरार हे सगळंच ट्रेलरमध्ये दिसत आहे. त्यामुळे ‘रानबाजार’ची उत्सुकता आता अधिकच शिगेला पोहोचली आहे. आजवरच्या वेबविश्वात कदाचित कधीही न पाहिलेली कथा या वेबसीरिजमध्ये पाहायला मिळणार आहे. 

‘रानबाजार’चे दिग्दर्शक अभिजित पानसे म्हणाले, “टिझरने सोशल मीडियावर अक्षरशः धुमाकूळ घातला आहे. पहिल्याच दिवशी टिझरने लाखो व्ह्युजचा टप्पा पार केला असून ट्रेलरही प्रदर्शित झाला आहे. त्यामुळे प्रेक्षक आता वेबसीरिज प्रदर्शनाच्या प्रतिक्षेत आहेत. ही वेबसीरिज पाहताना प्रेक्षकांच्या मनात असं काहीसं घडलं होतं,  कदाचित, असा विचार आल्याशिवाय राहणार नाही. राजकारणाभोवती फिरणारी ही कथा असली त्याच्याशी जोडल्या जाणाऱ्या अनेक गोष्टी आहेत, ज्या कल्पनेपलीकडच्या आहेत. हेच गूढ ‘रानबाजार’मध्ये उलगडणार आहे. 

एका दिवसात टीझरला 10 लाखाहून अधिक व्ह्यूज

प्राजक्ता माळी आणि तेजस्विनी पंडित यांनी या टीझरच्या माध्यमातून चाहत्यांचे लक्ष वेधून घेतले आहे. एका दिवसात या टीझरला 10 लाखाहून अधिक व्ह्यूज मिळाले आहेत. सोशल मीडियावर या टीझरला प्रेक्षकांच्या उस्फुर्त प्रतिक्रिया मिळत आहेत. 20 मे पासून ही वेब सीरिज प्रेक्षकांना पाहायला मिळणार आहे. अभिजित पानसे यांनी या वेब सीरिजचे दिग्दर्शन केले आहे. टीझर प्रदर्शित झाल्यामुळे प्रेक्षक आता वेब सीरिजची आतुरतेने वाट पाहत आहेत. 

संबंधित बातम्या