Shah Rukh Khan Birthday : बॉलिवूडचा किंग खान शाहरूख (Shah Rukh Khan Birthday) आज 57 वा वाढदिवस साजरा करतोय. शाहरूखच्या वाढदिवसानिमित्त मध्यरात्रीपासून 'मन्नत' (Mannat) बंगल्याबाहेर चाहत्यांची तुफान गर्दी पाहायला मिळाली. आपल्यावर प्रेम करणाऱ्या चाहत्यांचं प्रेम, आनंद आणि उत्साह पाहून शाहरूखही भारावला. यासाठी शाहरूख आज त्याच्या घराच्या बाल्कनीतून चाहत्यांना अभिवादन करण्यासाठी आला. यावेळी भारावलेल्या शाहरूख खानने सोशल मीडियावर चाहत्यांसाठी एक पोस्टदेखील शेअर केली आहे.
शाहरूख खानने ट्विटरवर चाहत्यांबरोबर काढलेला एक फोटो शेअर केला आहे. तसेच, या फोटोबरोबर त्याने एक पोस्टही लिहीली आहे. या पोस्टमध्ये शाहरूख म्हणाला की, "माझ्या वाढदिवशी मला भेटायला आलेल्या सर्व चाहत्यांचे मी मनापासून आभार मानतो. तसेच माझ्या वाढदिवसानिमित्त मला स्पेशल फिल करून दिल्याबद्दल आणि माझ्यावर करत आलेल्या प्रेमासाठी आपले खूप खूप आभार आणि धन्यवाद."
दरवर्षीप्रमाणे अभिनेता शाहरूख खान आपल्या चाहत्यांचं अभिवादन करण्यासाठी घराच्या बाल्कनीतून चाहत्यांना येऊन भेटतो. त्याची एक झलक पाहण्यासाठी लाखो चाहत्यांची गर्दी मन्नत बंगल्याबाहेर पाहायला मिळते. तशीच गर्दी याहीवर्षी पाहायला मिळाली. यावरूनच शाहरूख खानचा तगडा चाहता वर्ग दिसून येतो. शाहरूखची क्रेझ अजूनही चाहत्यांवर आहे.
दूरवरून एक झलक पाहण्यासाठी आलेल्या फॅन्सना भेटण्यासाठी शाहरूख त्याच्या बंगल्याच्या बाल्कनीत आला. यावेळी शाहरूखने पांढऱ्या रंगाचा टीशर्ट आणि जिन्स परिधान केली होती. तर, आपल्या हातांच्या दोन्ही बाह्या उघडून त्याने भेटण्यासाठी आलेल्या चाहत्यांचे स्वागत आणि अभिवादन केले.
शाहरूखचा जन्म 2 नोव्हेंबर 1965 रोजी दिल्लीत झाला. छोट्या पडद्यावरून त्याने आपल्या करिअरची सुरुवात केली. मालिकांमधून आपला ठसा उमटवल्यानंतर चित्रपटांकडे वळला आणि रुपेरी पडद्यावरचा सुपरस्टार झाला. शाहरूखने अनेक रोमॅंटिक चित्रपटांच्या माध्यमाथून चाहत्यांच्या मनात आपलं स्थान निर्माण केलं. त्याचबरोबर, गॅंगस्टर, नकारात्मक भूमिकांमधूनही त्याने आपल्या अभिनयाचे कौशल्य दाखवले.
महत्वाच्या बातम्या :
Shah Rukh Khan Birthday : अभिनेता शाहरुख खानचा आज वाढदिवस, 'मन्नत' बाहेर चाहत्यांची तुफान गर्दी