Vishal Nikam : ‘बिग बॉस मराठी’ विजेता विशाल निकम प्रेमापासून दुरावला? अभिनेत्याचा सौंदर्याशी ब्रेकअप!

Vishal Nikam Break up : चाहत्यांना, विशाल निकमची सौंदर्या कोण? याची उत्सुकता लागली होती. मात्र, आता सौंदर्याच्या रहस्यावरून पडदा उघडणारच नाहीये.

Vishal Nikam

Vishal Nikam Break up : ‘मराठी बिग बॉस’ (Bigg Boss Marathi 3) फेम अभिनेता विशाल निकम (Vishal Nikam) सध्या प्रचंड चर्चेत आला आहे. ‘बिग बॉस’च्या घरात असताना विशालची ‘सौंदर्या’ नेमकी कोण?, हे जाणून घेण्याची उत्सुकता अनेकांना लागली होती. मात्र, आता चाहत्यांसाठी एक वाईट बातमी समोर आली आहे. अभिनेता विशाल निकम याचा ब्रेकअप झाला आहे. नुकताच त्याने याचा खुलासा केला आहे. एका मुलाखतीत त्याने आपलं नातं तुटल्याचे म्हटले आहे.

‘बिग बॉस मराठी’च्या घरात विशाल निकम याने सौंदर्यावरील प्रेमाची कबुली दिली होती. मात्र, याच घरात त्याची अभिनेत्री सोनाली पाटील हिच्याशी असलेली जवळीक पाहता, अनेकांना तीच सौंदर्या असल्याचे वाटले होते. मात्र, यानंतर त्याने पोस्ट लिहित सौंदर्या एक सामान्य मुलगी असून, तिचा मनोरंजन विश्वाशी काहीही संबंध नसल्याचे म्हटले होते. तेव्हापासून चाहत्यांना सौंदर्या कोण? याची उत्सुकता लागली होती. मात्र, आता सौंदर्याच्या रहस्यावरून पडदा उघडणारच नाहीये.

आमचं नातं खरं होतं!

नुकतीच विशाल निकम याने ETimes TVला एक मुलाखत दिली. यात विशाल म्हणाला, ‘बिग बॉस मराठीमधून बाहेर आल्यानंतर आमचं नातं पाहिल्यासारखं नव्हतं, त्यामुळे आमचं ब्रेकअप झालं. आता ब्रेकअप म्हटल्यावर अनेकांना वाटेल की, मी सौंदर्याबद्दल खोटं बोलत होतो. पण, तसं नाही. आमचं नातं खरं होतं. सौंदर्या माझ्या आयुष्यात होती. पण आता ती नाहीये आणि मी आता सिंगल आहे.’ तर, आता मला केवळ माझ्या कामावर फोकस करायचा आहे, असेही तो म्हणाला.

सौंदर्या सामान्य मुलगी!

‘बिग बॉस मराठी’च्या घरात सौंदर्याच्या नावाची जोरदार चर्चा सुरु होती. त्यावेळी विशाल निकमने पोस्ट लिहित म्हटले होते की, 'मी यापूर्वी सांगितल्याप्रमाणे, योग्य वेळ आल्यावर आणि काही खाजगी गोष्टी सुरळीत झाल्यावर मी स्वत:हून सौंदर्याचं नाव सांगेल. ती एक समान्य मुलगी असून, अभिनय क्षेत्रासोबत तिचा काही एक संबंध नाही, त्यामुळे इंडस्ट्रीतील कोणत्याही व्यक्तीसोबत माझं नाव कृपया जोडू नका. कारण यामुळे विनाकारण त्या व्यक्तीला त्रास होऊ शकतो. प्लीज धीर धरा. मला वेळ द्या.'

विशाल हा मूळचा सांगली जिल्ह्यातील खानापूर तालुक्यातील देवीखिंडी गावचा आहे. 2018 मध्ये प्रदर्शित झालेल्या मिथुन या चित्रपटामध्ये विशालने महत्वाची भूमिका साकारली. 'साता जल्माच्या गाठी' या मालिकेतील विशालच्या अभिनयाला प्रेक्षकांची विशेष पसंती मिळाली. 'दख्खनचा राजा ज्योतिबा' या मालिकेमुळे विशालला लोकप्रियता मिळाली. तसेच, 'जय भवानी जय शिवाजी' या मालिकेमध्ये देखील विशालने महत्त्वाची भूमिका साकारली.   

हेही वाचा :