Alia Bhatt-Ranbir Kapoor : ‘मी तर रणबीरशी केव्हाच लग्न केलंय...’, आलिया भट्टनं केला मोठा खुलासा!

Alia-Ranbir Wedding : आलिया भट्टने नुकत्याच दिलेल्या एका मुलाखतीत खुलासा करत सांगितले की, माझ्या मनात मी आधीच रणबीरशी लग्न केले आहे.

alia

Alia Bhatt : बॉलिवूड अभिनेत्री आलिया भट्ट (Alia Bhatt) आणि अभिनेता रणबीर कपूर (Ranbir Kapoor) जवळपास चार वर्षांपासून एकमेकांना डेट करत आहेत. आता हे दोघे कधी लग्नबंधनात कधी अडकणार, हे सोशल मीडियावरील चाहत्यांना जाणून घ्यायचे आहे. मात्र आता अखेर आलियाने तिच्या आणि रणबीरच्या लग्नाबाबत खुलासा केला असून, ती म्हणाली की, आम्हा दोघांचे लग्न झाले आहे.

आलिया भट्टने नुकत्याच दिलेल्या एका मुलाखतीत खुलासा करत सांगितले की, माझ्या मनात मी आधीच रणबीरशी लग्न केले आहे. आलिया म्हणाली की, ‘माझ्या मनात मी आधीच रणबीरशी लग्न केले आहे. खरं तर, मी रणबीरशी खूप दिवसांपूर्वीच लग्न केले आहे. प्रत्येक गोष्टीची एक वेळ असते, आता जेव्हाही आम्ही लग्न सोहळा करू तो खूप चांगल्या पद्धतीने होईल.’

‘अशी’ झाली दोघांची पहिली भेट!

आलिया आणि रणबीर 2017मध्ये एका चित्रपटाच्या निमित्ताने भेटले होते. या जोडप्याने त्यांचे नाते काही काळ लोकांच्या नजरेपासून दूर ठेवले होते. परंतु, 2018 मध्ये त्यांनी अभिनेत्री सोनम कपूरच्या लग्नाच्या रिसेप्शनला एकत्र उपस्थित राहून त्यांच्या नात्यावर शिक्कामोर्तब केले.

2020मध्ये दिलेल्या एका मुलाखतीत जेव्हा रणबीरला त्याच्या आणि आलियाच्या नात्याबद्दल विचारण्यात आले तेव्हा रणबीर म्हणाला होता की, ‘जर कोरोना महामारी नसती, तर इतक्यात त्याने आलियासोबत लग्न केले असते.’

आलिया भट्ट आणि रणबीर कपूर दिसणार एकत्र!

आलिया भट्ट आणि रणबीर कपूर, अयान मुखर्जीच्या 'ब्रह्मास्त्र' या चित्रपटात एकत्र दिसणार आहेत. ‘ब्रह्मास्त्र’ व्यतिरिक्त, आलिया एसएस राजामौली यांच्या 'आरआरआर' आणि संजय लीला भन्साळीच्या 'गंगूबाई काठियावाडी'मध्ये देखील दिसणार आहे.

रणबीरबद्दल बोलायचे झाले, तर तो अखेर अभिनेता संजय दत्तच्या जीवनावर आधारित 'संजू' चित्रपटात दिसला होता. ‘ब्रह्मास्त्र’ व्यतिरिक्त तो ‘शमशेरा’ या अॅक्शन ड्रामामध्येही दिसणार आहे. या चित्रपटात वाणी कपूर आणि संजय दत्त यांच्याही महत्त्वाच्या भूमिका आहेत.

हेही वाचा :

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha