UP Election 2022: अयोध्येत भाजप आणि सपा उमेदवारांच्या समर्थकांमध्ये जोरदार मारपीट, अनेक जण जखमी

UP Election 2022 : शुक्रवारी रात्री आयोध्येत भाजप आणि समाजवादी पक्षाच्या समर्थकांमध्ये जोरदार मारामारी झाली आहे. या मारामारीवेळी दोन्ही गटाकडून काही राऊंड फायरिंगही झाली आहे. 

up election 2022 clash

UP Election 2022 : विधानसभा निवडणुकीमुळे उत्तर प्रदेशमध्ये राजकीय वातावरण चांगलच तापलं आहे. यादरम्यान शुक्रवारी रात्री उशीरा आयोध्येत भाजप आणि समाजवादी पक्षाच्या समर्थकांमध्ये जोरदार मारामारी झाली आहे. या मारामारीवेळी दोन्ही गटाकडून काही राऊंड फायरिंगही झाली आहे. 

सपा उमेदवार अभय सिंह आणि भाजप उमेदवार आरती तिवारी यांचे पती खब्बू तिवारी यांचे समर्थक समोरासमोर आल्याने ही घटना घडली. उत्तर प्रदेशमधील महाराजगंज पोलीस ठाण्याच्या नेवे कबीरपूर चौकात ही मारामारी झाली. 

ही घटना घडल्यानंतर समाजवादी पक्षाने ट्विट करून भाजपवर जोरदार हल्लाबोल केला आहे. सपाने केलेल्या ट्विटमध्ये म्हटले  आहे की, "गोसाईगंज विधानसभा मतदारसंघातील सपा उमेदवार अभय सिंह यांच्यावर भाजपच्या गुंडांनी केलेला हल्ला अत्यंत निषेधार्ह आहे. समाजवाद्यांना जनतेने पाठिंबा दिला असून जनताच सत्ताधाऱ्यांना उत्तर देईल, असे ट्विट समाजवादी पक्षाने केले आहे. दरम्यान, समाजवादी पक्षाने निवडणूक आयोगाकडे या प्रकरणी कारवाई करण्याची मागणी केली आहे.

दोन्ही पक्षातील अनेक जण जखमी  
अयोध्येचे एसएसपी शैलेश पांडे म्हणाले, "ठाणा महाराजगंज भागातील कबीरपूर चौकात एका पक्षाचा उमेदवार आणि त्याचे समर्थक आणि दुसऱ्या पक्षाच्या समर्थकांची वाहने समोरासमोर आली. यामध्ये दोन्ही बाजूंनी दगडफेक आणि गोळीबार झाल्याचा आरोप केला आहे. दोन्ही बाजूने गोळी झाडली गेली नाही. दोन्ही बाजूंच्या लोकांना किरकोळ दुखापत झाली आहे. परंतु, माध्यमांमध्ये दिशाभूल करणाऱ्या गोष्टी पसरवल्या जात आहेत. वाहनांच्या खिडक्यांच्या काचा फुटल्या आहेत."

महत्वाच्या बातम्या