माझ्यावर संशय घेतला जातोय मात्र मी गद्दारी करणार नाही, वळसे-पाटलांची आढळराव पाटलांशी छुप्या युतीच्या चर्चेवर स्पष्टोक्ती

विधानसभेत शिवाजी आढळराव-पाटील वळसे-पाटलांना मदत करतात आणि लोकसभेत वळसे-पाटील शिवाजी आढळरावांना मदत करतात अशा चर्चा शिरुरमध्ये केल्या जातात. मात्र अशी कोणतीही युती नाही, असं वळसे-पाटलांनी आज सांगितलं.

शिरुर : शिरुर लोकसभा मतदारसंघात चर्चिल्या जाणाऱ्या आढळराव पाटील आणि दिलीप वळसे पाटील यांच्या छुप्या युतीच्या चर्चेवर आज वळसे-पाटलांनी जाहीरपणे भाष्य केलं. शरद पवारांनी आजवर अनेक पदं दिली, त्यामुळे त्यांच्याशी आणि पक्षाशी कधीच गद्दारी केली नाही, असं वळसे-पाटील म्हणाले. विधानसभेत शिवाजी आढळराव-पाटील वळसे-पाटलांना मदत करतात आणि लोकसभेत वळसे-पाटील शिवाजी आढळरावांना मदत करतात अशा चर्चा शिरुरमध्ये केल्या जातात. मात्र अशी कोणतीही युती नाही, असं वळसे-पाटलांनी आज सांगितलं. गेल्या निवडणुकांमध्ये लोकसभा आणि विधानसभेत आपले उमेदवार पडले. पण मी निवडून आलो. लोकसभा निवडणुकीवेळी माझ्या विधानसभा मतदार संघात राष्ट्रवादी 18 हजार मतांनी पिछाडीवर होती, पण विधानसभा निवडणुकीत मला 60 हजार मतांनी निवडून दिलं. मतदारांचे माझ्यावरचे हे प्रेम असेल पण यामुळे माझ्यावर संशय घेतला जात आहे, की आढळराव लोकसभेत आणि वळसे-पाटील विधानसभेत असं आम्ही ठरवलं आहे. पण हे स्पष्ट व्हायला हवं, असेही ते म्हणाले.