Akola : अकोल्यात महापौरपदासाठी शेवटपर्यंत रस्सीखेच सुरूच; भाजपनंतर आता विरोधी पक्षांचाही विजयाचा दावा
Akola Election : आपल्यासोबत 44 नगरसेवक असल्याचा दावा करत भाजपने शहर सुधार आघाडीच्या नावाखाली गटाची नोंदणी केली आहे. तर आपल्यासोबत 41 नगरसेवक असल्याचा वादा काँग्रेस आणि विरोधी गटाने केला आहे.
अकोला : अकोल्यात महापौरपदाच्या निवडणुकीच्या पार्श्वभूमीवर राजकीय घडामोडींना वेग आला आहे. भाजप वगळता इतर पक्षांच्या बैठकीचे सत्र सुरू आहे. त्यामध्ये काँग्रेस, वंचित बहुजन आघाडी, उद्धव ठाकरे गटाची शिवसेना, AIMIM पक्षाचे सर्व नगरसेवक आणि जिल्हाध्यक्ष सहभागी झाले आहेत. या बैठकीला अपक्ष नगरसेवकांसह काँग्रेस आणि ठाकरेंच्या शिवसेनेचे आमदारही उपस्थित आहेत. शुक्रवारी होणाऱ्या महापौरपदाच्या निवडणुकीसंदर्भात ही बैठक अत्यंत महत्त्वाची मानली जात आहे.
दरम्यान, अपक्ष नगरसेवकांचा पाठिंबा मिळाल्याने आपले संख्याबळ 44 वर पोहोचल्याचा दावा भाजपकडून करण्यात येत आहे. भाजपकडे स्पष्ट बहुमत असल्याचा विश्वास व्यक्त करत शहर सुधार आघाडीच्या नगरसेवकांनी गटाची नोंदणी केली आहे. अकोल्यात बहुमतासाठी 41 नगरसेवकांची गरज आहे.
दुसरीकडे महाविकास आघाडीकडूनही सत्ता आमचीच येणार, असा ठाम विश्वास व्यक्त करण्यात येत आहे. आमच्याकडे संख्याबळ असून 41 हून अधिक नगरसेवक आपल्यासोबत असल्याचा दावा काँग्रेसचे आमदार साजिद खान पठाण यांनी केला आहे. त्यामुळे अकोल्यात महापौरपदाची बाजी नेमकी कोण मारणार, याचा अंतिम फैसला शुक्रवारच्या मतदानातूनच स्पष्ट होणार आहे.
अकोला महापालिकेतील पक्षीय बलाबल (Akola Municipal Corporation Election 2026)
एकूण जागा : 80
बहुमताचा आकडा : 41
भाजप : 38
काँग्रेस : 21
उबाठा : 06
शिंदे सेना : 01
अजित राष्ट्रवादी : 01
शरद राष्ट्रवादी : 03
वंचित : 05
एमआयएम : 03
अपक्ष : 02
Akola Mayor Election : महापौरपद ओबीसी महिला प्रवर्गासाठी राखीव
अकोला महापालिकेतील महापौरपद हे यावेळी ओबीसी महिला प्रवर्गासाठी राखीव आहे. या पार्श्वभूमीवर भाजपकडून नितू जगताप या महापालिकेतील सर्वात तरुण नगरसेविकेचं नाव आघाडीवर असल्याची माहिती आहे. नितू जगताप या प्रभाग क्रमांक 3-ब मधून पहिल्यांदाच भाजपकडून निवडून आल्या असून, त्या केवळ 25 वर्षांच्या आहेत. त्या शिक्षण आणि व्यवसायाने इंटेरियर डिझायनर असून, त्यांच्या तरुण वयामुळे आणि ओबीसी महिला प्रवर्गातील स्थानामुळे त्या महापौरपदाच्या शर्यतीत प्रबळ दावेदार मानल्या जात आहेत.
ही बातमी वाचा:
महत्त्वाच्या बातम्या
