NEET Exam Paper Leak: नीट पेपरफुटीचा मोठा फटका! इंजिनिअरिंग, फार्मसीची प्रवेश प्रक्रिया रखडणार; यंदा शैक्षणिक सत्र उशिरा सुरू होणार?

NEET Exam Paper Leak: 'नीट युजी' पेपर फुटीचे पडसाद आता राज्यातील इतर अभ्यासक्रमांच्या प्रवेश प्रक्रियेवरही उमटू लागले आहेत.

NEET Exam Paper Leak

Source : ABP Majha

NEET Exam Paper Leak: देशभरात खळबळ उडवून देणाऱ्या 'नीट युजी' (NEET-UG) परीक्षेतील प्रश्नपत्रिका फुटीचे पडसाद आता राज्यातील इतर अभ्यासक्रमांच्या प्रवेश प्रक्रियेवरही उमटू लागले आहेत. राष्ट्रीय परीक्षा संस्थेने (NTA) 3 मे 2026 रोजी घेतलेली आणि 22 लाखांहून अधिक विद्यार्थ्यांनी दिलेली 'नीट-यूजी 2026' परीक्षा रद्द करण्यात आली आहे. या निर्णयामुळे राज्यातील इंजिनिअरिंग (Engineering) आणि फार्मसी (Pharmacy) अभ्यासक्रमांचे प्रवेश वेळापत्रक पूर्णपणे कोलमडण्याची भीती निर्माण झाली आहे.

NEET Exam Paper Leak: ऑल इंडिया कोट्यातील प्रवेशांना 'नीट'चा आधार

राज्यातील इंजिनिअरिंगच्या काही विशिष्ट अभ्यासक्रमांसाठी आणि बी.फार्मसीच्या (B.Pharmacy) 15 टक्के ऑल इंडिया कोट्यातील प्रवेशांसाठी 'नीट' परीक्षेचे गुण ग्राह्य धरले जातात. ऑल इंडिया कोट्यातील प्रवेश प्रक्रिया पूर्णपणे 'नीट'च्या गुणांवर आधारित असल्याने, या परीक्षेचा निकाल जाहीर झाल्याशिवाय राज्य सामाईक प्रवेश परीक्षा कक्षाला (CET Cell) आपली पुढील प्रक्रिया सुरू करता येणार नाही. परिणामी, सीईटी सेलची संपूर्ण प्रवेश प्रक्रिया सध्या अडचणीत सापडली आहे.

NEET Exam Paper Leak: पुनर्परीक्षेमुळे प्रक्रियेला लागणार ब्रेक

आता 21 जून रोजी 'नीट'ची पुनर्परीक्षा घेतली जाणार आहे. या परीक्षेचा निकाल लागण्यासाठी आणखी 20 ते 25 दिवसांचा कालावधी लागण्याची शक्यता आहे. म्हणजेच, जुलै महिन्याच्या मध्यापर्यंत किंवा अखेरपर्यंत नीटचा निकाल हाती येईल. तोपर्यंत राज्यातील इंजिनिअरिंग आणि फार्मसीची प्रवेश प्रक्रिया सुरू करता येणार नाही. यामुळे नेहमी जून-जुलैमध्ये सुरू होणारी प्रवेश प्रक्रिया यंदा थेट जुलैनंतरच सुरू होऊ शकेल.

NEET Exam Paper Leak: शैक्षणिक सत्र उशिरा सुरू होण्याची शक्यता

प्रवेश प्रक्रिया लांबल्यामुळे त्याचा थेट परिणाम नवीन शैक्षणिक सत्रावर (Academic Session) होणार आहे. कॉलेज सुरू होण्यास आधीच उशीर झाल्यास, प्रथम वर्षाच्या विद्यार्थ्यांचा अभ्यासक्रम वेळेत पूर्ण करण्याचे मोठे आव्हान प्राध्यापक आणि कॉलेज प्रशासनासमोर असणार आहे. वारंवार होणाऱ्या या परीक्षांच्या गोंधळामुळे विद्यार्थ्यांमध्ये आणि पालकांमध्ये तीव्र संतापाचे व चिंतेचे वातावरण आहे.

NEET Exam Paper Leak: नीट पेपरफुटी प्रकरणात आणखी एकाला अटक

नीट पेपरफुटी प्रकरणात पुण्यातून आणखी एका आरोपीला सीबीआयकडून अटक करण्यात आली आहे. अटक करण्यात आलेला हा आरोपी बालरोगतज्ज्ञ असून डॉक्टर मनोज शिरुरे असं त्याचं नाव आहे. मनोज शिरुरे याने शिवराज मोटेगावकरकडून स्वतःच्या मुलासाठी पेपर खरेदी केल्याचा आरोप आहे. नीट पेपरफुटीप्रकरणी सीबीआयने मनोज शिरुरेला लातूरहून चौकशीसाठी पुण्यात आणलं होतं. या चौकशीनंतर मनोज शिरुरेला सीबीआयने अटक केली. डॉक्टर मनोज शिरुरे हा मूळचा लातूरचा आहे. 

आणखी वाचा