शेतीच्या धुऱ्याचा वाटप ठरलं जीवघेणं, वर्ध्यात काकू अन् चुलत भावाला कुऱ्हाडीनं संपवलं, नंतर आरोपीनं विष पित टोकाचं पाऊल उचललं
ही घटना समजताच अल्लीपूर पोलीस घटनास्थळी दाखल झाले. पोलीस अधीक्षक अनुराग जैन आणि अतिरिक्त पोलीस अधीक्षक राहुल चौहान यांनीही घटनास्थळी भेट दिली आणि संपूर्ण घटनेचा आढावा घेतला.
Wardha Crime: वर्धा जिल्ह्यातील निमसडा गावात एक धक्कादायक घटना घडली. शेतीच्या वादावरून झालेल्या वादात चुलत भावाने आपल्या काकू आणि चुलत भावाची कुऱ्हाडीने हत्या केली आहे. त्यानंतर आरोपीने विष प्राशन करून आत्महत्या केली. या दुहेरी खून आणि आत्महत्येच्या घटनेने परिसरात एकच खळबळ उडाली आहे. घटनेत मृत झालेल्यांमध्ये साधना सुभाष मोहिजे (वय 55) आणि त्यांचा मुलगा नितीन सुभाष मोहिजे (वय 27) यांचा समावेश आहे. या दोघांची हत्या महेंद्र मोहिजे या त्यांच्या पुतण्याने केली. पोलीस तपासानुसार, गेल्या काही दिवसांपासून महेंद्र आणि नितीन यांच्यामध्ये शेतीच्या धुऱ्याच्या वाटपावरून वाद सुरू होता. गावातील काही जमिनी ठेक्याने लावण्यावरूनही तणाव वाढला होता.
नेमकं घडलं काय?
गेल्या काही दिवसांपासून शेतीच्या धुऱ्याच्या वाटपावरून तसेच ठेक्याने शेती लावण्यावरून वाद सुरू होता. शुक्रवारी सकाळी वाद इतका टोकाला गेला की, महेंद्र मोहिजेने संतप्त अवस्थेत नितीन आणि त्याची आई साधना यांच्यावर कुऱ्हाडीने हल्ला करत त्यांचा जागीच खून केला. खून केल्यानंतर महेंद्रने स्वतः विष प्राशन केलं आणि काही वेळातच त्याचाही मृत्यू झाला. ही घटना समजताच अल्लीपूर पोलीस घटनास्थळी दाखल झाले. पोलीस अधीक्षक अनुराग जैन आणि अतिरिक्त पोलीस अधीक्षक राहुल चौहान यांनीही घटनास्थळी भेट दिली आणि संपूर्ण घटनेचा आढावा घेतला. मृतदेह उत्तरीय तपासणीसाठी वर्धा जिल्हा रुग्णालयात पाठवण्यात आले आहेत. पोलीसांकडून मिळालेल्या माहितीनुसार, आरोपी महेंद्र मोहिजे हा साधना मोहिजे यांचा पुतण्या होता, तर नितीन मोहिजे त्याचा चुलत भाऊ होता. शेतीच्या मालकीहक्कावरून आणि उत्पन्नाच्या वाटपावरून अनेक दिवसांपासून हे वाद सुरू होते.सध्या पोलीस पुढील तपास करत असून, शेजारी आणि नातेवाईकांचे जबाब नोंदवले जात आहेत.
मित्रांच्या मदतीने भाऊ-वहिनीवर जीवघेणा हल्ला
बुलढाणा जिल्ह्यातील हतेडी बुद्रुक (Hatedi Budruk) गावात सख्ख्या भावाने दोन मित्रांच्या मदतीने आपल्या स्वतःच्या भाऊ आणि वहिनीवर जीवघेणा हल्ला केल्याची धक्कादायक घटना घडली आहे. या घटनेमुळे परिसरात एकच खळबळ उडाली आहे. या हल्ल्यात अरुण निकाळजे हे गंभीर जखमी झाले आहेत. त्यांच्यावर सध्या जिल्हा सामान्य रुग्णालयात उपचार सुरू आहेत.अरुण निकाळजे आणि त्यांच्या पत्नी शेतात जाण्यासाठी घराबाहेर रस्त्यावर उभे होते. यावेळी अचानक अरुण यांचा सख्खा भाऊ आणि त्याच्या दोन मित्रांनी पती-पतींवर हल्ला केला. या हल्ल्यात अरुण निकाळजे हे गंभीररित्या जखमी झाले आहेत. संपूर्ण मारहाणीची घटना परिसरातील सीसीटीव्ही कॅमेऱ्यात कैद झाली आहे.
हेही वाचा:
महत्त्वाच्या बातम्या
