Satara Crime News: गैरसोयींची पोलखोल केली अन्...; कॉलेजमधून काढण्याची धमकी, दबावाखाली आलेल्या विद्यार्थिनीची हॉस्टेलच्या तिसऱ्या मजल्यावरून उडी; साताऱ्यातील घटना
Satara Crime News: साताऱ्यातील नामांकित यशवंतराव चव्हाण इन्स्टिट्यूट ऑफ सायन्स कॉलेजच्या लेडीज हॉस्टेलमध्ये एक धक्कादायक प्रकार उघडकीस आला आहे.
Satara Crime News: साताऱ्यातील नामांकित यशवंतराव चव्हाण इन्स्टिट्यूट ऑफ सायन्स (Yashavantrao Chavan Institute of Science) कॉलेजच्या लेडीज हॉस्टेलमध्ये (Ladies Hostel) एक धक्कादायक प्रकार उघडकीस आला आहे. वसतिगृहातील गैरसोयींविरोधात आवाज उठवल्याच्या रागातून झालेल्या मानसिक त्रासाला कंटाळून सृष्टी भानुदास बिरामणे (वय 18) या विद्यार्थिनीने वसतिगृहाच्या तिसऱ्या मजल्यावरून उडी मारून आपले जीवन संपवले. ही दुर्दैवी घटना 2 सप्टेंबर 2026 रोजी घडली होती. याप्रकरणी आता सातारा शहर पोलीस ठाण्यात (Satara City Police Station) वसतिगृहाच्या रेक्टर, प्राचार्यांसह होस्टेल कमिटी सदस्यांवर गुन्हा दाखल (Case Registered) करण्यात आला आहे.
याबाबत मिळालेल्या माहितीनुसार, मृत विद्यार्थिनी सृष्टी हिने लेडीज हॉस्टेलमधील शौचालयातील गैरसोयींबाबत प्रशासनाकडे तक्रार केली होती. इतकेच नव्हे तर तिने या दुरवस्थेचा एक व्हिडिओ देखील काढला होता. या गोष्टीचा राग मनात धरून होस्टेलच्या रेक्टर जयश्री जकाते आणि होस्टेल कमिटीच्या सदस्यांनी सृष्टीवर प्रचंड दबाव आणण्यास सुरुवात केली. तिच्यावर सतत मानसिक अत्याचार करून तिला कॉलेजमधून काढून टाकण्याची थेट धमकी देण्यात आल्याचा आरोप करण्यात आल आहे.
Satara Crime News: तिसऱ्या मजल्यावरून उडी मारत आयुष्य संपवलं
या सततच्या दबावाला आणि मानसिक कुचंबणेला कंटाळून अखेर सृष्टीने वसतिगृहाच्या तिसऱ्या मजल्यावरून खाली उडी मारून आपली जीवनयात्रा संपवली. या संपूर्ण प्रकरणात मुलीने तक्रार करूनही कॉलेजचे प्राचार्य सुरेश साळुंखे यांनी या गंभीर बाबीकडे जाणीवपूर्वक दुर्लक्ष केल्याचे तपासात निष्पन्न झाले आहे.
Satara Crime News: सातारा शहर पोलीस ठाण्यात गुन्हा दाखल
याप्रकरणी मुलीच्या पालकांच्या तक्रारीवरून आणि प्राथमिक तपासाच्या आधारे सातारा शहर पोलिसांनी वसतिगृहाच्या रेक्टर जयश्री जकाते, प्राचार्य सुरेश साळुंखे आणि होस्टेल कमिटीच्या सदस्यांविरोधात गुन्हा दाखल केला आहे. या उच्चशिक्षित आणि जबाबदार घटकांच्या मनमानी कारभारामुळे एका विद्यार्थिनीचा बळी गेल्याने सातारा शहरात तीव्र संताप व्यक्त केला जात आहे. या प्रकरणाचा पुढील सखोल तपास सातारा शहर पोलीस करत आहेत.
राज्य आणि देश-विदेशातील महत्त्वाच्या बातम्या; पाहा व्हिडीओ
इतर महत्त्वाच्या बातम्या
महत्त्वाच्या बातम्या
