Palghar Crime News: ‘किरकोळ दुखापत असतानाही ICU मध्ये ठेवलं’; त्या जखमी गोविंदांची डॉक्टरांविरोधात पोलिसांत तक्रार, पालघर रुग्णालयातील मारहाण प्रकरणात नवा ट्विस्ट
Palghar Crime News: पालघरच्या रिलीफ हॉस्पिटलच्या रिसेप्शनिस्टला केलेल्या मारहाण प्रकरणात नवीन ट्विस्ट आला आहे. ज्या जखमी गोविंदांवरून हा सर्व वाद सुरू झाला त्यांनीच आता डॉक्टरविरोधात तक्रार दिलीय.
Palghar Crime News: पालघरच्या रिलीफ हॉस्पिटलमधील (Relief Hospital) रिसेप्शनिस्टला मारहाण केल्याप्रकरणी शिवसेनेचे जिल्हाप्रमुख कुंदन संखे (Kundan Sankhe), आमदार राजेंद्र गावित (Rajendra Gavit) यांचे चिरंजीव रोहित गावित (Rohit Gavit) यांच्यासह 17 जणांविरोधात गुन्हा दाखल झाल्यानंतर या प्रकरणाला आता नवे वळण मिळाले आहे. ज्या जखमी गोविंदावरून (Govinda) हा संपूर्ण वाद सुरू झाला, त्याच गोविंदाने आता डॉक्टरांविरोधात पालघर पोलीस ठाण्यात लेखी तक्रार दिली आहे.
जखमी गोविंदांनी आपल्या तक्रारीत गंभीर आरोप केले आहेत. आपल्याला किरकोळ दुखापत (Minor Injury) झाली असतानाही रुग्णालय प्रशासनाकडून जाणीवपूर्वक ICU मध्ये (Intensive Care Unit) ठेवण्यात आले आणि डिस्चार्ज (Discharge) दिला जात नव्हता, असा दावा त्यांनी केला आहे.
Palghar Crime News: ‘वारंवार विनंती करूनही डॉक्टरांनी दुर्लक्ष केलं’
जखमी गोविंदांच्या म्हणण्यानुसार, डिस्चार्ज मिळावा यासाठी त्यांनी डॉक्टरांकडे अनेक वेळा विनंती केली. मात्र, डॉक्टरांकडून त्यांच्या विनंतीकडे दुर्लक्ष करण्यात आले. त्यामुळे अखेर त्यांनी शिवसेनेचे जिल्हाप्रमुख कुंदन संखे यांची मदत घेतली, असा दावा तक्रारीत करण्यात आला आहे. तसेच, गरज नसतानाही आपल्यावर उपचार करण्याचा प्रयत्न करण्यात आला आणि जाणीवपूर्वक ICU मध्ये ठेवण्यात आल्याचा आरोपही जखमी गोविंदांनी केला आहे. या संपूर्ण प्रकरणाची चौकशी करून संबंधित डॉक्टरांविरोधात गुन्हा दाखल करावा, अशी मागणी त्यांनी पोलिसांकडे केली आहे.
Palghar Crime News: आमदार राजेंद्र गावितांसह पदाधिकारी पोलीस ठाण्यात
दरम्यान, डॉक्टरांविरोधात गुन्हा दाखल करण्याच्या मागणीसाठी पालघर विधानसभा मतदारसंघाचे आमदार राजेंद्र गावित यांच्यासह शिवसेनेचे प्रमुख पदाधिकारी, कार्यकर्ते आणि गोविंदा पथकातील कार्यकर्ते मोठ्या संख्येने पालघर पोलीस ठाण्याबाहेर दाखल झाले. यावेळी डॉक्टरांविरोधात तातडीने गुन्हा दाखल करण्याची मागणी करण्यात आली. त्यामुळे रुग्णालयातील मारहाण प्रकरणानंतर आता डॉक्टरांविरोधातील तक्रारीमुळे या प्रकरणाला वेगळे वळण मिळाले आहे.
Palghar Crime News: ‘गुन्हा दाखल होईपर्यंत ठिय्या आंदोलन’
डॉक्टरांविरोधात गुन्हा दाखल केला जात नाही, तोपर्यंत पालघर पोलीस ठाण्याबाहेर ठिय्या आंदोलन करण्यात येईल, असा इशारा आमदार राजेंद्र गावित यांनी दिला आहे. त्यामुळे आधी रुग्णालयातील रिसेप्शनिस्टला मारहाण केल्याच्या प्रकरणात 17 जणांवर गुन्हा दाखल झाल्यानंतर आता जखमी गोविंदांनी डॉक्टरांविरोधात केलेली तक्रार आणि त्यानंतर आमदारांसह शिवसेना पदाधिकाऱ्यांनी घेतलेली भूमिका यामुळे पालघरमधील हे प्रकरण आणखी चिघळण्याची शक्यता आहे.
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा
महत्त्वाच्या बातम्या
