Honey Trap : 'त्या' अधिकाऱ्याकडून अनेकदा पैशाचा व्यवहार: आरोपीची पत्नी आणि अधिकाऱ्याची ओळख जुनीच

आरोपीची पत्नी आणि अधिकाऱ्याचे संबंध हे लग्नाच्या अगोदरपासूनचे आहे. त्यातून दोघांचे नेहमीच भेटणे व्हायचे. याची माहिती अमितला लग्नानंतर झाली. अधिकाऱ्याची 'मोठी कमाई' असल्याने अमितने प्लॅन तयार केला आणि पत्नीलाही सहभागी केले.

symbolic image

नागपूरः नागपूर महानगरपालिकेतील (NMC) एका बड्या अधिकाऱ्याला हेरून त्याच्याशी केलेल्या सेक्सचॅटची रेकॉर्डिंग करत हनी ट्रॅपमध्ये अडकविण्याचा प्रयत्न नागपूर पोलिसांच्या गुन्हे शाखेने हाणून पाडला. दरम्यान आरोपी अमित सोनी हा या अधिकाऱ्याकडून सातत्याने पैसे घेत असल्याची माहिती समोर आली आहे. त्यातूनच अमितची हिंम्मत वाढून त्याने 1 कोटी रुपयांची मागणी केली

अमित सोनी यास पोलिसांनी  हॉटेल अशोक (Hotel Ashok) येथून पैसे स्विकारताना रंगेहात अटक केली. गेल्या तीन महिन्यापूर्वी अमित आणि त्याची पत्नी यांनी शहरातील एका अधिकाऱ्याला जाळ्यात अडकवले.  अमित याच्या पत्नीची अधिकाऱ्याशी जुनी ओळखी होती. त्यांचे 'संबंध'ही चांगले होते. अमितने त्याच्या पत्नीची या बड्या अधिकाऱ्यासोबतची चॅटिंग बघितली असल्याने अमित अधिकाऱ्याला वेळोवेळी पैसे मागत होता. अधिकाऱ्यानेही त्याला पैसे दिले. त्यातून अमितने पत्नीचा वापर करुन अधिकाऱ्याकडून अधिकची रक्कम वसूल करण्याचा प्लॅन केला. त्यातून त्याच्या पत्नीने त्यांच्याशी संवाद साधणे सुरु ठेवले.

हळूहळू संभाषण अश्लिल (Adult Chatting) स्तरावर पोहोचले. अधिकारी आणि ती महिला दोघांनीही एकमेकांना अनेक खासगी छायाछित्रे शेअर केली. पुढे व्हिडीओ शेअर करणेही सुरु झाले. हे सर्व संभाषण अमित रेकॉर्डिंग करायचा. त्यानंतर सर्व रेकॉर्डिंग आणि फोटो संबंधित अधिकाऱ्याला पाठवून खंडणी मागणे सुरू केले. त्यामुळे कंटाळलेल्या अधिकाऱ्याने सदर पोलिस (Crime Branch) ठाण्यात तक्रार दाखल केली. पोलिसांनी शहानिशा करुन सापळा रचला आणि हॉटेलमध्ये अमितला रंगेहात अटक केली होती.

दोघांचे 'संबंध' जुनेच

अमितची पत्नी आणि अधिकारी यांची जुनीच ओळख असल्याची माहिती आहे. हे संबंध महिलेच्या लग्नापूर्वीपासून असल्याचे सूत्रांनी सांगितले. त्यातून दोघांचे नेहमीच भेटणे व्हायचे. याची माहिती अमितला लग्नानंतर झाली. अधिकाऱ्याची 'मोठी कमाई' असल्याचे त्याला माहिती पडले आणि त्यातून त्याने मास्टरप्लॅन तयार केला. त्यात पत्नीलाही सहभागी केल्याची माहिती आहे.