नवी मुंबई : खारघरमध्ये एका 19 वर्षीय तरुणीला कोल्ड्रिंकमध्ये दारु मिसळून दोन तरुणांनी तिच्यावर लैंगिक अत्याचार केल्याचा प्रकार उघडकीस आला आहे. या प्रकरणी खारघर पोलिसांनी गुन्हा दाखल केला आहे. तसेच एका आरोपीला अटक करण्यात आली असून दुसऱ्या फरार आरोपींचा शोध सुरु आहे.
खारघर सेक्टर बारामध्ये राहणाऱ्या एका 19 वर्षीय तरुणीची एका बस चालकाशी ओळख होती. बस चालक आणि त्याच्या साथीदाराने सदर तरूणीस भेटीसाठी बोलावलं. तरुणीने भेटण्यासाठी होकार देताच रात्री बसचालकाने तिला बसमध्येच भेटीसाठी बोलावलं. त्यानंतर गप्पा मारताना तिला कोल्ड्रिंक पिण्यासाठी दिलं. मात्र त्या कोल्ड्रिंकमध्ये बस चालक आणि त्याच्या साथीदाराने आधीत दारू मिसळली होती. दारु मिसळलेलं कोल्ड्रिंक प्यायल्यानंतर तरुणी नशेत बेशुद्ध झाली.
बेशुद्ध झालेल्या तरुणीचा गैरफायदा घेत बस चालक आणि त्याच्या साथीदाराने तरुणीवर लैंगिक अत्याचार केले. त्यानंतर तरुणीला दोघांनी तसंच बेशुद्ध अवस्थेत सेक्टर 18 मधील संजीवनी शाळेसमोर सोडून दिलं. दोन्ही आरोपींना तरुणीला रस्त्यावर सोडून पळ काढला. मुलगी घर न आल्यामुळे तरुणीच्या कुटुंबियांनी तिचा शोध सुरु केला. परंतु, मुलीचा कुठेच पत्ता न लागल्यामुळे कुटुंबियांनी तत्काळ पोलिसांत धाव घेतली.
रात्री बाराच्या सुमारास एक तरुणी बेशुद्ध अवस्थेत संजीवनी शाळेसमोरील रस्त्यावर पडून असल्याची माहिती पोलिसांना मिळाली. माहिती मिळताच पोलिसांनी तत्काळ घटनास्थळी धाव घेतली. त्यानंतर तरुणीला ताब्यात घेत उपचारांसाठी रुग्णालयात दाखल केलं. दुसऱ्या दिवशी तरुणी शुद्धीवर आल्यानंतर पोलिसांनी तिची चौकशी केली. त्यावेळी तरुणीने घडलेला सर्व प्रकार पोलिसांना सांगितला. याप्रकरणी पोलिसांनी गुन्हा दाखल केला असून एका आरोपीला अटकही केली आहे. दुसरा आरोपी अद्याप फरार असून पोलीस त्याचा शोध घेत आहेत.
महत्त्वाच्या बातम्या :