Kalyan : दोन एकरचा करार, पण साडेसात एकर हडपले, कोट्यवधींचा घोटाळा केल्याचा शिक्षण संस्थेवर आरोप
या प्रकरणाचा पोलिसांकडून तपास सुरू असून संबंधित शासकीय विभागाकडूनही अनुदानाशी संबंधित कागदपत्रांची चौकशी सुरू असल्याची माहिती मिळत आहे.
ठाणे : कल्याणजवळील भिवंडी तालुक्यातील नांदकर गावातील शिक्षण संस्थेवर कोट्यवधी रुपयांच्या शासकीय अनुदान घोटाळ्याचा आरोप करण्यात आला आहे. शाळा उभारण्यासाठी केवळ दोन एकर जमिनीचा करार असताना कागदपत्रांमध्ये साडेसात एकर जमीन दाखवून शासनाची फसवणूक केल्याचा दावा करण्यात आला आहे. या प्रकरणी संस्थेच्या सचिवाविरोधात पडघा पोलीस ठाण्यात गुन्हा दाखल करण्यात आला असून पोलिसांसह संबंधित शासकीय विभागाकडूनही चौकशी सुरू आहे.
Education Grant Scam : अनुदान मिळवण्यासाठी बनावट कागदपत्रांचा आरोप
मिळालेल्या माहितीनुसार, भिवंडी तालुक्यातील नांदकर गावातील शेतकरी शिक्षण प्रसारक मंडळाने शाळा उभारण्यासाठी सुरुवातीला जमीन मालक आणि सहमालकांसोबत साडेसात एकर जमिनीचा करार केला होता. मात्र अवघ्या आठवड्याभरात संस्थेच्या मागणीनुसार हा करार रद्द करून फक्त दोन एकर जमिनीचा नवीन करार करण्यात आला. त्यानंतर या जागेवर डी.बी. स्कूल आणि वसतीगृह उभारण्यात आले.
RTI Revelation : माहितीच्या अधिकारातून धक्कादायक खुलासा
2019 पासून शाळा सुरू असून काही वर्षांनंतर जमीन सहमालकांनी संस्थेकडे शाळेचा आर्थिक हिशोब मागितला. मात्र संस्थेकडून वारंवार टाळाटाळ होत असल्याने सहमालकांनी माहितीच्या अधिकाराखाली (RTI) कागदपत्रांची मागणी केली.
या कागदपत्रांमधून धक्कादायक बाब समोर आली. प्रत्यक्षात संस्थेकडे फक्त दोन एकर जमिनीचा वैध करार असताना शासकीय कागदपत्रांमध्ये साडेसात एकर जमीन असल्याचे दाखवण्यात आले, असा आरोप करण्यात आला आहे.
Fraud Allegation: शासनाची कोट्यवधींची फसवणूक?
तक्रारदाराच्या वकिलांनी आरोप केला की, या कथित बनावट कागदपत्रांच्या आधारे संस्थेने शासनाकडून शाळेसाठी कोट्यवधी रुपयांचे अनुदान मिळवले. या प्रकरणी जमीन सहमालकाने न्यायालयात धाव घेतल्यानंतर पडघा पोलीस ठाण्यात संस्थेच्या सचिवाविरोधात गुन्हा दाखल करण्यात आला आहे.
Police Investigation: पोलिसांकडून तपास सुरू
या प्रकरणाचा पोलिसांकडून तपास सुरू असून संबंधित शासकीय विभागाकडूनही अनुदानाशी संबंधित कागदपत्रांची चौकशी सुरू असल्याची माहिती मिळत आहे. दरम्यान, या प्रकरणातील आरोप सिद्ध झाल्यास शिक्षण क्षेत्रातील अनुदान प्रक्रियेमधील मोठा घोटाळा उघड होण्याची शक्यता व्यक्त केली जात आहे.
ही बातमी वाचा:
महत्त्वाच्या बातम्या
