सोने तस्करी करणाऱ्या टोळीचे पितळ उघड, 9.6 कोटी रुपयांचे 12 किलो सोने जप्त

डीजे लाईटमध्ये लपवण्यात आलेले 12 किलो सोने महसूल गुप्तचर संचालनालयाच्या (डीआरआय) अधिकाऱ्यांनी जप्त केलं आहे.

Gold smuggling

Source : Gold smuggling

Gold smuggling : डीजे लाईटमध्ये लपवण्यात आलेले 12 किलो सोने महसूल गुप्तचर संचालनालयाच्या (डीआरआय) अधिकाऱ्यांनी जप्त केलं आहे. याप्रकरणी दोन तस्करांना अटक करण्यात आली आहे. यामुळं  सोने तस्करी (Gold smuggling) करणाऱ्या टोळीचे पितळ उघड झाले आहे. जप्त केलेल्या सोन्याची किंमत ही 9.6 कोटी रुपये होती.

डीजे लाईटमध्ये लपवून चोरट्या मार्गाने नेण्यात येत असलेले 9.6 कोटी रुपये किमतीचे 12 किलो सोने मुंबईच्या महसूल गुप्तचर संचालनालयाने (डीआरआय ), मुंबईतील एअर कार्गो कॉम्प्लेक्समधून जप्त केले आहे. डीआरआयच्या अधिकाऱ्यांनी गुप्तचरांकडून मिळालेल्या माहितीच्या आधारे कारवाई करत, मालाची तपासणी केली असता प्रत्येक डीजे लाईटमधून सुमारे 3 किलो सोने हस्तगत करण्यात आले. त्यानंतरच्या तपासात एका गोदामाची झडती घेतली असता, त्याच पद्धतीचा वापर करून त्यासाठी केलेल्या खाचांमध्ये सोने लपवून तस्करीसाठी वापरण्यात येत असलेले,  68 डीजे लाईट्स आढळले.

मुंबईत एका आठवड्यात तस्करी केलेले सुमारे 48 किलो सोने जप्त 

संबंधित टोळीने  या पूर्वी देखील देशात  मोठ्या प्रमाणात सोन्याची तस्करी केली असल्याचा संशय आहे. सोन्याच्या तस्करीत सहभागी असलेल्या दोन जणांना अटक करण्यात आली आहे. डीआरआय, मुंबईत गेल्या एका आठवड्यात तस्करी केलेले सुमारे 48 किलो सोने जप्त केले आहे. सोने तस्करी करणाऱ्या टोळ्यांविरुद्धच्या कारवाईत उल्लेखनीय यश मिळवले असल्याचे यातून दिसून येते.

गेल्या काही वर्षात सोन्याच्या तस्करीत मोठी वाढ

सोन्याच्या आयात शुल्कातील वाढ आणि भारतात सोन्याच्या किमतीत झालेली भरमसाठ वाढ या पार्श्वभूमीवर गेल्या वर्षभरापासून सोने तस्करीच्या घटना मोठ्या प्रमाणावर वाढताना दिसत आहेत. केवळ सोन्याचे दागिने, बिस्किटे, बारच नव्हे तर सोन्याची पेस्ट आणि सोन्याची पावडर या माध्यमातूनही सोन्याची तस्करी होत आहे. विशेष म्हणजे, सोन्याची पेस्ट आणि सोन्याची पावडर यावर प्रक्रिया करत त्यातून सोने घडवत त्यांची विक्री भारतामध्ये होत आहे. अशा घटनांवर विविध विभाग लक्ष ठेऊन आहेत. गेल्या काही दिवसात देशात दुबई, आबुधाबी, बँकॉक, मस्कत, सिंगापूर येथून वर्षभरात मोठ्या प्रमाणावर सोन्याची तस्करी झाली आहे. विशेष म्हणजे, मुंबई, दिल्ली या विमानतळावर तपास यंत्रणा अधिक सतर्क असल्यामुळे अनेक तस्करांनी परदेशातून भारतीय छोट्या विमानतळांकडे जाणाऱ्या विमानातून सोने तस्करी करण्याचा देखील प्रयत्न अलीकडे सुरू केला आहे.

महत्वाच्या बातम्या: