Sangli Crime : बनावट नोटा छापून वापरात आणणाऱ्या टोळीचा पर्दाफाश; आठ लाखांच्या नोटा जप्त, चौघांना अटक

सांगलीतील इस्लामपूर पोलिसांनी बनावट नोटा छापणारी आणि वापरात आणणाऱ्या चौघांना बेड्या ठोकल्या आहेत. पोलिसांनी 7 लाख 66 हजार यांच्या बनावट नोटा आणि छपाईचे साहित्य ताब्यात घेऊन कारखाना उद्ध्वस्त केला आहे.

Sangli Fake Currency Note News

सांगली : बनावट नोटा छापणारी आणि वापरात आणणाऱ्या टोळीचा सांगलीतील इस्लामपूर पोलिसांनी पर्दाफाश केला आहे. यातील मुख्य संशयिताच्या घरावर छापा टाकून पोलिसांनी 7 लाख 66 हजार यांच्या बनावट नोटा आणि छपाईचे साहित्य ताब्यात घेऊन कारखाना उद्ध्वस्त केला आहे.

इस्लामपूर इथल्या आयसीआयसीआय बँकेच्या शाखेतील पैसे भरण्याच्या डिपॉझिट मशीनमध्ये या टोळीकडून तीन हजाराच्या बनावट नोटा भरण्यात येत होत्या. यातील मुख्य संशयिताच्या सांगलीतील घरावर छापा टाकून पोलिसांनी सात लाख 66 हजार रुपये किंमतीच्या बनावट नोटा आणि छपाईचे साहित्य ताब्यात घेऊन कारखाना उद्ध्वस्त केला. या प्रकरणी चार संशयितांना इस्लामपूर पोलिसांनी अटक केली आहे. 

एचडीएफसी बँकेतील अधिकारी संग्राम सदाशिव सूर्यवंशी यांनी पाचशे रुपयांच्या सहा नोटा बनावट असल्याचं माहित असतानाही त्या डिपॉझिट मशीनमध्ये भरल्या होत्या. याप्रकरणी आयसीआयसीआय बँकेच्या अधिकाऱ्यांनी त्याच्याविरोधात 19 मे रोजी पोलिसात फिर्याद दिली होती. त्यानंतर पोलिसांनी संग्राम सूर्यवंशीकडे केलेल्या तपासात पिंटू निवृत्ती पाटील, सुरेश नानासाहेब पाटील, मुख्य सूत्रधार श्रीधर बापू घाडगे, रमेश ईश्वर चव्हाण यांची नावं निष्पन्न झाली. 

मुख्य सूत्रधार श्रीधर घाडगे यांच्या सांगलीतील भाड्याने राहत असलेल्या घरावर पोलिसांनी पाळत ठेवली होती. तो त्याच्या मोटारीतून घाईगडबडीने जात असताना पोलिसांना दिसला. त्याच्या मोटारीची झडती घेतल्यावर पाचशे, दोनशे, शंभर, पन्नास आणि वीस रुपयांच्या एकूण 6 लाख 94 हजार दोनशे पन्नास रुपयांच्या बनावट नोटांचे बंडल मिळून आले. त्याच्या घराची झडती घेतली असता बनावट नोटांची छपाई करण्याचे साहित्य मिळून आले. या बनावट नोटा छपाई करण्यासाठी वापरलेल्या प्रिंटर आणि 72 हजार रुपयांच्या बनावट नोटा सापडल्या. घाडगेने पाण्याच्या टाकीत लपून ठेवलेले इतर साहित्यही पोलिसांनी हस्तगत केले.

इतर बातम्या