आठवडी बाजारात बनावट नोटा देऊन शेतकऱ्यांची फसवणूक; पोलीस सतर्क, दोनजण ताब्यात

बनावट नोटा देऊन शेतकऱ्यांची फसवणूक करण्याच्या प्रकारात सोलापूरात सातत्याने वाढ होताना दिसत आहे. मोडनिंब येथील अशाच एका प्रकरणात पोलिसांनी आरोपीकडून 67 हजारांच्या बनावट नोटा जप्त केल्या आहेत.

सोलापूर: दुष्काळ, अवकाळी पाऊस आणि बर्ड फ्ल्यूमुळे शेतकरी आधीच अडचणीत असताना आता बनावट नोटा देऊन त्यांच्या फसवणुकीचे प्रकार घडताना दिसत आहेत. मोडनिंब येथे बनावट नोटा देऊन शेतकऱ्याची फसवणूक करण्याच्या प्रयत्नात असलेल्या दोघांना पोलिसांनी ताब्यात घेतलं आहे.

मोहोळ येथील बकऱ्यांच्या आठवडा बाजारात शेतकऱ्यांना नकली नोटा देऊन केलेली फसवणूक ताजी असतानाच सदरची घटना शनिवारी मोडनिंब येथेही घडली आहे. मोडनिंब येथील आठवडी बाजारात बनावट नोटा देऊन शेळ्या खरेदी करण्याचा प्रयत्न केल्याचं समोर आलंय. या प्रकरणी मोडनिंब पोलिसांनी सिद्धेश्वर कैचे या आरोपीला त्याच्या साथीदारासह ताब्यात घेतलं आहे.

या प्रकरणी पोलिसांनी आरोपीकडून 67 हजार रुपयांच्या बनावट नोटाही जप्त केल्या आहेत. यामध्ये दोन हजार रुपयाच्या आणि पाचशे रुपयाच्या बनावट नोटा आहेत. आरोपीकडे या नोटा कोठून आल्या याचा तपास पोलीस करत आहेत. या प्रकरणी अटक करण्यात आलेल्या आरोपीची रवानगी पोलीस कोठडीत करण्यात आली आहे.

माढा तालुक्यातील मोडनिंब येथे शेळ्या-मेंढ्यांचा मोठा बाजार भरतो. या ठिकाणी शेळ्या-मेंढ्या खरेदी-विक्रीची लाखो रुपयांची उलाढाल होते. सोलापूर जिल्ह्यातील मोहोळ, पंढरपुर ,बार्शी, करमाळा या तालुक्यातील शेतकरी आपल्या शेळ्यामेंढ्या मोडनिंब च्या बाजारात विक्रीसाठी घेऊन येतात. सातारा, पुणे, सोलापूर, कोल्हापूर, मिरज ,सांगली, कर्नाटक या भागातील व्यापारी मोडनिंब येथे खरेदीसाठी येतात.

शनिवारी सकाळी नऊ वाजण्याच्या सुमारास मोहोळ तालुक्यातील पोखरापूर येथील शेतकरी कुंडलिक लेंगरे हे शेतकरी आपल्या दोन मेंढ्या व सहा बकरी घेऊन मोडनिंब बाजारात विक्रीसाठी बसले होते. त्यावेळी सिद्धेश्वर कैचे या तरुणाने 40 हजार रुपयाला लेंगरे यांच्याकडील आठ बकऱ्यांचा व्यवहार ठरवला. ही रक्कम देताना त्याने शेतकऱ्याला बनावट नोटा दिल्या . शेतकऱ्याने या नोटा खऱ्या नसल्याचे सांगताच या तरुणाने तेथून धूम ठोकली. मात्र बाजारात आलेल्या इतर तरुणांनी आरोपीला पकडले.

बनावट नोटा देऊन शेतकऱ्याच्या बकऱ्या मोहोळकडे घेऊन जात असताना असताना शेटफळ जवळ सदरची गाडी पकडण्यात आली आणि दोन्ही आरोपींना पोलिसांच्या ताब्यात दिले . पोलिसांनी आरोपीकडून 67 हजाराच्या बनावट नोटा ताब्यात घेतल्या आहेत. या बनावट नोटा बनवणारे मोठे रॅकेट असण्याची शक्यता असून पोलिसांनी या प्रकरणी तपास सुरु केला आहे .