Ashok Kharat : खरातचे पाप, गुन्हे अमाप! अशोक खरातविरोधात तक्रारींची संख्या वाढली, आणखी 11 महिला भोंदूच्या विरोधात उभ्या

Ashok Kharat Crime Case : भोंदू मांत्रिक अशोक खरात प्रकरणात तक्रारींचा आकडा आता 22 वर पोहोचला आहे. या आधी त्याच्यावर 12 गुन्हे दाखल करण्यात आले आहेत.

Ashok Kharat Crime Case

Source : abp majha

नाशिक : भोंदू मांत्रिक... वासनांध सैतान... धूर्त दलाल... या सगळ्याला समानार्थी शब्द म्हणजे नाशिकच्या पोलीस कोठडीची हवा खाणारा अशोक खरात. अशोक खरातवर दाखल 12 गुन्ह्यांचा वेगवेगळ्या यंत्रणांकडून तपास सुरू आहे. मात्र गुन्ह्यांचा हा आकडा लवकरच वाढणार आहे. कारण आणखी 11 महिला पुढे आल्या असून त्यांनी अशोक खरातविरोधात तक्रार दाखल केली आहे. या महिलांना खरातनं आपल्या जाळ्यात कसं ओढलं? यासंबंधी काही माहिती समोर आली आहे.

भोंदू मांत्रिक अशोक खरात प्रकरणात दररोज नवे धक्कादायक खुलासे समोर येत असून तक्रारींचा आकडा आता 22 वर पोहोचला आहे. आधीच अनेक गुन्ह्यांमध्ये अटक झालेल्या खरातविरोधात आणखी 11 महिलांनी लैंगिक शोषणाचे गंभीर आरोप करत तक्रार दाखल केली आहे. या घडामोडींमुळे राज्यभरात संतापाची लाट उसळली आहे.

Ashok Kharat SIT Helpline Update : हेल्पलाईनवर तक्रारींचा ओघ कायम

अशोक खरातच्या दुष्कृत्यांचा पर्दाफाश झाल्यानंतर महिलांना पुढे येण्यासाठी एसआयटीकडून हेल्पलाईन सुरू करण्यात आली होती. त्यानंतर तक्रारींचा ओघ थांबण्याचे नाव घेत नाही. आतापर्यंत 12 गुन्हे दाखल झाले असून त्यापैकी 8 प्रकरणे लैंगिक शोषणाशी संबंधित आहेत, तर 4 गुन्हे आर्थिक फसवणुकीचे आहेत. आता नव्याने 11 महिलांनी तक्रार दिल्याने प्रकरण अधिकच गंभीर बनले आहे.

Ashok Kharat Exploitation Case : ‘ऊर्जादान’च्या नावाखाली शोषणाचे आरोप

तक्रारदार महिलांनी दिलेल्या माहितीनुसार, अशोक खरात ऊर्जादान आणि शरीरशांतीच्या बहाण्याने महिलांना जाळ्यात ओढत असे. त्यानंतर त्यांचे लैंगिक शोषण केले जात असल्याचा आरोप आहे. काही महिलांनी आवाज उठवण्याचा प्रयत्न केला असता त्यांच्या कुटुंबीयांना जीवे मारण्याच्या धमक्या देण्यात आल्याचेही समोर आले आहे.

Ashok Kharat Investigation Update : विविध यंत्रणांकडून चौकशी सुरू

या प्रकरणाचा तपास सध्या विविध पातळ्यांवर सुरू आहे. महिलांच्या लैंगिक शोषण प्रकरणी एसआयटी तपास करत आहे, तर आर्थिक गैरव्यवहाराच्या अनुषंगाने ईडी चौकशी करत आहे. समता पतसंस्थेतील व्यवहारांबाबत शिर्डी पोलीस स्वतंत्र तपास करत आहेत.

दरम्यान, अशोक खरातची पोलीस कोठडी संपल्यानंतर त्याला व्हिडीओ कॉन्फरन्सिंगद्वारे न्यायालयात हजर करण्यात आले. एका प्रकरणात न्यायालयीन कोठडी मिळाली असली तरी दुसऱ्या प्रकरणात पुन्हा पोलीस कोठडीसाठी त्याला न्यायालयात सादर केले जाणार आहे.

Ashok Kharat Case Political Reaction : तपासावरून राजकीय प्रश्नचिन्ह

या प्रकरणावरून राजकीय वर्तुळातही प्रश्न उपस्थित होत आहेत. विरोधकांनी तपासाची गती आणि पारदर्शकतेवर प्रश्नचिन्ह उपस्थित केले आहे. प्रत्येक आरोपीची सखोल चौकशी करून सत्य बाहेर आणावे, अशी मागणी केली जात आहे.

Ashok Kharat Case Social Impact : अंधश्रद्धा आणि महिलांची सुरक्षितता पुन्हा चर्चेत

या घटनेमुळे समाजातील अंधश्रद्धा आणि महिलांच्या सुरक्षिततेचा प्रश्न पुन्हा एकदा ऐरणीवर आला आहे. एका बाजूला महिला सर्व क्षेत्रांत प्रगती करत असताना, दुसऱ्या बाजूला अशा भोंदूगिरीमुळे त्यांचे शोषण होत असल्याचे वास्तव चिंताजनक असल्याचे मत व्यक्त होत आहे.

ही बातमी वाचा: