Persistent Systems : पर्सिस्टंट सिस्टम्स जर्मनीतील कंपनीचं अधिग्रहण करणार, 11 हजार कोटींची डील, 350 नवे ग्राहक मिळणार
Persistent Systems : पर्सिस्टंट सिस्टम्स जर्मनीतील कंपनीचं अधिग्रहण करणार आहे. 11 हजार कोटींची डील यासाठी होणार आहे. दरम्यान आज पर्सिस्टंटच्या शेअरमध्ये घसरण झाली.
मुंबई : भारतीय आयटी क्षेत्रातील प्रमुख कंपनी पर्सिस्टंट सिस्टम्स जर्मन कंपनी नागारोची खरेदी करणार आहे. पर्सिस्टंटचा या अधिग्रहणानंतर सुमारे तीन अब्ज डॉलर्सची एआय-आधारित डिजिटल इंजिनिअरिंग क्षेत्रातील एक मोठी कंपनी उभारण्याचा विचार आहे. नागारोच्या अधिग्रहणानंतर 40 हून अधिक देशांमध्ये 46000 पेक्षा जास्त कर्मचारी परसिस्टंट परिवारात सामिल होतील, ज्यामध्ये भारतातील अंदाजे 37000, उत्तर अमेरिकेतील अंदाजे 3500 आणि युरोपमधील अंदाजे 3000 कर्मचाऱ्यांचा समावेश आहे.
पर्सिस्टंट सिस्टम्स भारतीय आयटी क्षेत्रातील प्रमुख कंपनी आहे. या कंपनीचे मालक पुण्यातील उद्योजक आनंद देशपांडे आहेत. त्यांच्या पर्सिस्टंट सिस्टम्स कंपनीकडून जर्मनीची नागारो कंपनी खरेदी केली जाईल. दोन्ही कंपन्यांमध्ये 1.3 अब्ज डॉलर्सचा रोख रकमेचा खरेदी करार होणार आहे. म्हणजेच जवळपास 11 हजार कोटींची डील या व्यवहारात होणार आहे.
नागारोच्या खरेदीनंतर पर्सिस्टंटचं बाजारमूल्य तीन अब्ज डॉलर्सवर जाणार आहे. पर्सिस्टंट सिस्टम्स सर्वात मोठी सातवी भारतीय कंपनी होणार आहे. या खरेदीनंतर 40 हून अधिक देशांत 46 हजार कर्मचारी संख्या होणार आहे. पर्सिस्टंट सिस्टम्स मध्ये सध्या भारतात 37 हजार कर्मचारी आहे. नागारो कंपनीच्या ग्राहकांमध्ये भारतात सिमेन्स,लुफ्तान्सा,बीएमडब्ल्यू, मारुती सुझूकी याचा समावेश आहे.
पर्सिस्टंटला अगोदर नागारोचा सर्वात मोठा शेअरधारक Lantano Beteiligungen GmbH यांच्याकडून समर्थन मिळालं आहे. त्यांनी या कंपनीतील 21 टक्के भागीदारी विकण्यास सहमती दर्शवली आहे. नागारोचं व्यवस्थापन आणि संचालक मंडळानं या कराराला समर्थन दिलं आहे. त्यांनी त्यांच्या शेअरधारकांना या कराराला स्वीकारण्याचा सल्ला दिला आहे.
पर्सिस्टंट दोन्ही कंपन्या एकत्र आल्यानं ग्लोबल एआय आधारित डिजिटल इंजिनिअरिंग कंपनी होईल. ज्याचं वार्षिक उत्पन्न 24 हजार कोटींपेक्षा अधिक असेल. या डीलनंतर कंपनीकडे 350 हून अधिक मोठे क्लाइंटस असतील. त्यांचं TAM 1400 अब्ज डॉलर्स असेल.
या करारानंतर पर्सिस्टंटचं यूरोपियन बाजारातील वर्चस्व वाझेल. वार्षिक आधारावर त्यांचं महसूल 9 टक्क्यांनी वाढून 22 टक्क्यांवर पोहोचेल. कंपनीचंच जर्मनीत वर्चस्व वाढेल. दोन्ही कंपन्यां एआय आधारित डिजिटल इंजिनिअरिंग, क्लाउड, ईआरपी आणि कस्टम एक्सपीरिअन्स यात कार्यरत आहेत. दरम्यान, आज पर्सिस्टंटच्या शेअरमध्ये 10 टक्क्यांची घसरण झाली.
महत्त्वाच्या बातम्या
