कार खरेदी कधी करावी? कर्ज किती घ्यावे; जाणून घ्या 20-4 -10 फॉर्म्युला नेमका काय आहे?

प्रत्येकालाच आपल्या घरासमोर कार असावी असे वाटते. पण कार खरेदी करताना काही गोष्टी लक्षात घेतल्या पाहिजेत. अन्यथा तुम्हाला भविष्यात मोठ्या अडचणींना सामोरे जावे लागू शकते.

car buying formula (फोटो सौजन्य- एबीपी नेटवर्क)

Source : Other

मुंबई : माझ्या घरासमोर एक कार उभी असावी, असे प्रत्येकालाच वाटते. प्रत्येकाची एक तरी ड्रीम कार असतेच. ती कार खरेदी करण्यासाठी अनेकजण दिवसरात्र मेहनत करतात. पण कार खरेदी करताना काही बाबी लक्षात घेणे गरजेचे आहे. कार खरेदी केल्यास आपली आर्थिक ओढाताण होणार नाही ना? हा कार खरेदी करतानाचा सर्वांत मोठा आणि महत्त्वाचा प्रश्न आहे. ही ओढातान होऊ नये यासाठी 20-4-10 हा फॉर्म्यूला पाळणे गरजेचे आहे. या फॉर्म्यूल्यानुसार कार खरेदी केल्यास तुम्हाला भविष्यात आर्थिक अडचण येणार नाही. 

किती रुपयांची कार खरेदी करावी? 

आज घडीला एकापेक्षा कार बाजारात उपलब्ध आहेत. काही लाखांपासून ते कित्येक कोटींपर्यंतच्या कार तुम्हाला पाहायला मिळतील. तुमची ड्रीम कारदेखील कित्येक लाख किंवा कोटी रुपयांची असू शकते. पण तुम्ही प्रत्यक्षात कोणती कार खरेदी करू शकता, हे समजून घेणे गरजेचे आहे. तुमचा वार्षिक पगार जेवढा आहे, त्या पगाराच्या अर्ध्या किमतीहून कमी रकमेची कार खरेदी करायला हवी. उदाहरणासह सांगायचं झाल्यास समजा तुमचा वार्षिक पगार हा 10 लाख रुपये आहे. असे असेल तर तुम्ही 5 लाख रुपयांच्या आत किंमत असलेलीच कार खरेदी केली पाहिजे. तसे न केल्यास तुमचे आर्थिक गणित बिघडू शकते. 

कार नेमकी कधी खरेदी करावी? 

तुमचा पगार किती आहे? यावरून तुम्ही कार कधी खरेदी करावी, हे ठरवायला हवे. जेव्हा तुमचा पगार तुमच्या आवडत्या कारच्या किमतीपेक्षा दुप्पट होईल तेव्हा तुम्ही आरामात कार लोन घेऊ शकता. कर्ज घेऊनच कार खरेदी करायची आहे? त्यामुळे ईएमआयची चिंता कशाला. प्रत्येक महिन्याला ईएमआय भरता येईल, असा विचार अनेकजण करतात आणि कार खरेदी करतात. पण तसे केल्यास तुम्ही भविष्यात आर्थिकदृष्ट्या अडचणीत येऊ शकता.  

कार खरेदीचा 20-4-10 फॉर्म्यूला नेमका काय आहे? 

तुम्ही 20-4-10 या फॉर्म्यूल्याचे पालन केल्यास कार खरेदी करताना तुम्हाला अडचण येणार नाही. या फॉर्म्यूल्यातील 20 चा अर्थ म्हणजे तुम्ही कार खरेदी करताना कमीत कमी 20 टक्के डाऊन पेमेंट दिले पाहिजे. 4 आकड्याचा अर्थ हा तुमच्या कार लोनचा कालावधी हा चार वर्षांपेक्षा अधिक नसावा. 10 चा अर्थ हा तुमच्या कार लोनचा ईएमआय हा तुमच्या पगाराच्या 10 व्या भागापेक्षा अधिक नसावा. हे सूत्र पाळल्यास तुम्हाला कार खरेदी करताना अडचण येणार नाही. 

लेटेस्ट मॉडेलच्या प्रेमात पडू नका

कार खरेदी करताना तुम्ही जेवढे जास्त डाऊन पेमेंट द्याल, तेवढाच तुम्हाला ईएमआय कमी येईल. तसेच कार खरेदी करताना लेटेस्ट मॉडेलच्या प्रेमात पडू नका. लेटेस्ट मॉडेल असेल तर कार करेदी करताना तुम्हाला डिस्काउंट मिळत नाही. त्यामुळे उगीचच लेटेस्ट मॉडेलच्या मोहात पडून कर्जबाराजारी होऊ नये. 

हेही वाचा :