Budget 2025 :निर्मला सीतारामन 1 फेब्रुवारीला अर्थसंकल्प सादर करणार, कमोडिटी बाजार सुरु राहणार, शेअर बाजाराचं काय?

Budget 2025 : केंद्रीय अर्थमंत्री निर्मला सीतारामन येत्या 1 फेब्रुवारीला अर्थसंकल्प सादर करणार आहेत. त्या दिवशी शेअर बाजार सुरु असणार का हा प्रश्न अनेकांच्या मनात आहे.

बजेट 2025

Source : एबीपी माझा ग्राफिक्स टीम

Budget 2025 Share Market MCX Trading नवी दिल्ली : केंद्रीय अर्थमंत्री निर्मला सीतारामन येत्या 1 फेब्रुवारीला देशाचा अर्थसंकल्प सादर करणार आहेत. निर्मला सीतारामन  2025-26 या आर्थिक वर्षासाठीचा केंद्रातील एनडीए सरकारचा अर्थसंकल्प मांडतील. केंद्रीय अर्थमंत्र्‍यांकडून सर्वसामान्यांसह विविध घटकांना अपेक्षा आहेत. कोणत्या क्षेत्राला काय मिळणार याकडे सर्वांचं  लक्ष लागलं आहे. अर्थसंकल्प सादर होण्याचा दिवस शनिवार असल्यानं त्या दिवशी  शेअर बाजार सुरु राहणार की नाही हा प्रश्न अनेक गुंतवणूकदारांच्या मनात आहे.कारण, ज्या दिवशी अर्थसंकल्प सादर केला जातो, तो दिवस गुंतवणूकदारांसाठी महत्त्वाचा असतो. 

कमोडिटी बाजार सुरु राहणार की बंद?

मल्टी कमोडिटी एक्सचेंज शनिवारी 1 फेब्रुवारी रोजी खुला राहणार आहे. अर्थ संकल्प सादर होत असतानाच एमसीक्सवर ट्रेडिंग होईल. शनिवारी अर्थसंकल्पानिमित्तानं विशेष ट्रेडिंग सत्र चालवलं जाणार आहे. हे सत्र चालवलं जाण्यामागील प्रमुख कारण म्हणजे अर्थसंकल्प सादर होतो त्या दिवशी जे तेजी आणि घसरणीचं वातावरण असतं त्याचा लाभ शेअर बाजारातील गुंतवणूकदारांसह कमोडिटी बाजारातील गुंतवणूकदारांकडून देखील घेतला जावा. त्या दिवशी एमसीक्सवर ट्रेडिंग सुरु ठेवल्यानं गुंतवणूकदारांचं नुकसान देखील कमी होईल. एमसीक्सवर ट्रेडिंग सत्र सकाळी 9 पासून रात्री 5 वाजेपर्यंत सुरु राहील. 

मल्टी कमोडिटी एक्सचेंजकडून 29 जानेवारीला जारी करण्यात आलेल्या प्रसिद्धीपत्रकात याबाबत माहिती देण्यात आली आहे. शनिवारी 1 फेब्रुवारीच्या दिवशी विशेष ट्रेडिंग सेशन चालवलं जाणार आहे. कारण, बाजारातील भागीदारांना बजेटमुळं येणाऱ्या रिअल टाइम रिस्क मॅनेजमेंट करता यावी. याशिवाय हेजिंग रिक्वायरमेंट देखील पूर्ण करता येईल.1 फेब्रुवारीचा दिवस सेटलमेंट हॉलिडेप्रमाणं असेल यामध्ये पे-इन किंवा पे आऊट होणार नाही.  

एमसीक्सनं परिपत्रकात म्हटलं की 31 जानेवारी 2025 संपणाऱ्या कॉट्रॅक्टच्या डिलिव्हरी सेटलमेंट कॅलेंडरमध्ये बदल होणार नाहीत. 31 जानेवारी आणि 1 फेब्रुवारीच्या ट्रेड्सचं सेटलमेंट 3 जानेवारीला होईल. 

शेअर बाजार सुरु राहणार की बंद

शनिवारी 1 फेब्रुवारीला भारतीय शेअर बाजार देखील सुरु राहणार आहे. एनएसई आणि बीएसईवर सामान्य कारभार सुरु राहील. इतर दिवसांप्रमाणं 9.15 वाजता बाजार खुला होईल आणि 3.30 पर्यंत सुरु राहील. 

इतर बातम्या :

(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)