एक्स्प्लोर

Tata I Phone : 'टाटा' तयार करणार 'मेड इन इंडिया' आयफोन; 1000 कोटींमध्ये झाली डील

Tata I phone : टाटा समूह आता आयफोन तयार करणार आहे. त्यामुळे आता आगामी काळात मेड इन इंडिया आयफोन जागतिक बाजारात दिसून येणार आहे.

By : एबीपी माझा वेब टीम | Edited By: श्रीकांत भोसले | Updated at : 27 Oct 2023 09:58 PM (IST)

नवी दिल्ली : तंत्रज्ञान आणि मोबाईल फोन उत्पादनाची मोठं हब असलेल्या चीनला मोठा झटका बसला आहे. कोरोना आणि लॉकडाऊननंतर चीनची अर्थव्यवस्था वाईट अवस्थेत आहे. भारत आणि चीनमधील तणाव (India China Tension) आणि तेढ कोणापासून लपून राहिलेली नाही. अशा परिस्थितीत जागतिक स्तरावर भारताने उत्पादक बाजारपेठ म्हणून उदयास येत आहे. आता, त्यादृष्टीने भारताला आणखी एक मोठे यश मिळाले आहे. आता आयफोनची (I-phone) निर्मिती भारतात होणार आहे. 'मेड इन इंडिया' आयफोन (Made In India I-phone) भारतात बनणार आहे. देशातील सर्वात मोठ्या कंपन्यांपैकी एक असलेल्या टाटा समूहाकडून (Tata Group) हे काम पूर्ण केले जाणार आहे.

टाटा तयार करणार आयफोन

टाटाने अॅपलचा पुरवठादार विस्ट्रॉनचा कारखाना विकत घेतला आहे. ही तैवानची कंपनी खरेदी करून टाटा येत्या अडीच वर्षांत आयफोनचे उत्पादन सुरू करणार आहे. टाटा समूहाची कंपनी टाटा इलेक्ट्रॉनिक्स प्रायव्हेट लिमिटेड (TEPL) ने विस्ट्रॉन इन्फोकॉम मॅन्युफॅक्चरिंग (इंडिया) प्रायव्हेट लिमिटेड $ 125 दशलक्ष म्हणजे सुमारे 1000 कोटी रुपयांना विकत घेतली आहे. गेल्या वर्षभरापासून दोघांमध्ये चर्चा सुरू होती. टाटा समूहासोबत विस्ट्रॉन कारखाना घेण्याच्या कराराला मान्यता देण्यात आली आहे. ही माहिती देताना इलेक्ट्रॉनिक्स आणि तंत्रज्ञान मंत्री राजीव चंद्रशेखर यांनी टाटा समूहाचे अभिनंदन केले. या करारानंतर टाटा समूह अडीच वर्षांत देशांतर्गत आणि जागतिक बाजारपेठेसाठी अॅपल आयफोन भारतात तयार करेल.

टाटाचा आयफोन अडीच वर्षांत बाजारात दाखल होणार

विस्ट्रॉनने 2008 मध्ये भारतात प्रवेश केला. 2017 मध्ये कंपनीने Apple साठी iPhone चे उत्पादन सुरू केले. या प्लांटमध्ये आयफोन-14 मॉडेलची निर्मिती करण्यात आली आहे. 10,000 हून अधिक कामगारांसह हा प्लांट ताब्यात घेऊन टाटांनी मोठे यश मिळवले आहे. टाटाच्या अधिग्रहणानंतर विस्ट्रॉन पूर्णपणे भारतीय बाजारपेठेतून बाहेर पडेल. आम्ही तुम्हाला सांगतो की विस्ट्रॉन व्यतिरिक्त फॉक्सकॉन आणि पेगाट्रॉन देखील भारतात आयफोन उत्पादनात व्यस्त आहेत. आता भारतातील स्वदेशी कंपनी टाटानेही यात उडी घेतली आहे.