Share Market : इस्त्रायल-इराण युद्धाचा फटका, शेअर बाजारात भूकंप, गुंतवणूकदारांचे 1.65 लाख कोटी बुडाले, HDFC बँकेला सर्वाधिक फटका
Share Market Update : इराण आणि इस्त्रायल यांच्यातील युद्धाचा फटका शेअर बाजाराला बसला आहे. पाच दिवसात एचडीएफसी बँकेच्या गुंतवणूकदारांना फटका बसला आहे.
मुंबई : गेल्या आठवड्यातील 9 ते 13 जून हे दिवस गुंतवणूकदारांसाठी खराब ठरले. इस्त्रायल आणि इराण यांच्यातील वाढत्या संघर्षामुळं पाच दिवसात गुंतवणूकदारांचे 1.65 लाख कोटी बुडाले. सेन्सेक्समध्ये 1070.39 अंकांची म्हणजेच 1.30 टक्के घसरण झाली. सेन्सेक्सवरील टॉप 10 पैकी 8 कंपन्यांचं बाजारमूल्य घटलं. एचडीएफसी बँकेला सर्वात मोठा फटका बसला.
सेन्सेक्सवरील टॉप 10 पैकी 8 कंपन्यांचं बाजारमूल्य घटलं
रिलायन्स इंडस्ट्रीज (Reliance), एचडीएफसी बँक (HDFC Bank), भारती एअरटेल (Bharti Airtel), आयसीआयसीआय बँक (ICICI Bank), भारतीय स्टेट बँक (SBI), भारतीय जीवन बीमा निगम (LIC), बजाज फायनान्स (Bajaj Finance) आणि हिंदुस्तान यूनिलीवर लिमिटेड (HUL) चं बाजारमूल्य घटलं. तर, टीसीएस आणि इन्फोसिसचं बाजारमूल्य वाढलं.
9 जून ते 13 जून या कालावधीत सर्वाधिक नुकसान एचडीएफसी बँकेच्या गुंतवणूकदारांचं झालं. एचडीएफसीचं बाजारमूल्य 5 दिवसात 47075.97 कोटी रुपयांनी घटलं. सध्या कंपनीचं बाजारमूल्य 1468777.88 कोटी इतकं आहे. यानंतर आयसीआयसीआय बँकेचं बाजारमूल्य 30677.44 कोटी रुपयांनी घटून 1010375.63 कोटी रुपयांवर आलं. रिलायन्स इंडस्ट्रीजचं बाजारमूल्य 21516.63 कोटी रुपयांनी घटून 1931963.46 कोटी रुपयांवर आलं. स्टेट बँकेचं बाजारमूल्य 18250.85 कोटी रुपयांनी घटून 707186.89 कोटी रुपयांवर आलं.
हिंदुस्तान यूनिलीवर लिमिटेडचं बाजारमूल्य 16388.4 कोटी रुपयांनी घटून 544893.71 कोटी रुपयांवर आलं. भारती एअरटेलचं बाजारमूल्य 15481.22 कोटी रुपयांनी घटून 1050413.33 कोटी रुपयांवर आलं. एलआयसीचं बाजारमूल्य 13693.62 कोटी रुपयांनी घसरुन 593379.66 कोटी रुपयांवर आलं. बजाज फायनान्सचं बाजारमूल्य 2417.36 कोटी रुपयांनी घसरुन 580052.09 कोटी रुपयांवर आलं.
टीसीएस आणि इन्फोसिसचे गुंतवणूकदार मालामाल
एकीकडे सेन्सेक्सवरील टॉप 10 पैकी 8 कंपन्यांना नुकसान सहन करावं लागलं असलं तरी इन्फोसिस आणि टीसीएसच्या गुंतवणूकदारांना दिलासा मिळाला. टीसीएसचं बाजारमूल्य 22215.06 कोटी रुपयांनी वाढून 1247190.95 कोटी रुपयांवर आलं. तर, इन्फोसिसचं बाजारमूल्य 15578.3 कोटी रुपयांनी वाढून 665318.03 कोटी रुपयांवर आलं.
रिलायन्स पहिल्या स्थानी कायम
मुकेश अंबानी यांच्या रिलायन्स इंडस्ट्रीजला मोठं नुकसान सहन करावं लागलं असलं तरी ते बाजारमूल्याच्या निकषावर पहिल्या स्थानावर आहेत. त्यानंतर एचडीएफसी बँक, टीसीएस, भारती एअरटेल, आयसीआयसीआय बँक, भारतीय स्टेट बँक, इन्फोसिस, एलआयसी, बजाज फायनान्स आणि हिंदुस्तान यूनिलीवर लिमिटेड असा क्रम आहे.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
महत्त्वाच्या बातम्या
