Share Market : Sensex आणि Nifty म्हणजे काय? डिमॅट अकाऊंट कसं काढायचं? जाणून घ्या सर्वकाही
अलिकडच्या तरुणांचा शेअर मार्केटकडे कल वाढला आहे. पण त्याच वेळी यातील काही संकल्पना नेमक्या काय आहेत हे त्यांना माहिती नसतं. त्या संकल्पना अगदी सोप्या शब्दात सांगणारी ही मालिका....
मुंबई : गेल्या काही महिन्यांपासून शेअर बाजारमध्ये नव्या गुंतवणूकदारांचा कल वाढत चालला आहे. 2020 मार्च पासून आतापर्यंत म्हणजेच दीड वर्षाच्या कालावधीत चार कोटीहून अधिक डिमॅट अकाऊंट उघडली गेली. आणि यात सर्वाधिक कल हा 20 ते 35 वयोगटातील तरुणांचा आहे. पण नव्याने येणाऱ्या गुंतवणूकदारांना शेअर बाजारात गुंतवणूक कशी करायची याबाबत अनेक प्रश्न असतात. डिमॅट अकाऊंट कसे उघाडयचं?, सेन्सेक्स म्हणजे काय?, निफ्टी 50 म्हणजे काय? या संकल्पना आपण जाणून घेणार आहोत
डिमॅट अकाऊंट कसे उघडायचे?
डिमॅट अकाऊंट (Demat Account) उघडण्यासाठी कोणत्याही बँकेत जाण्याची गरज नाही. शेअर बाजारात तुम्हाला गुंतवणूक करण्यासाठी झिरोदा, अपस्टॉक, एंजेल ब्रोकिंग असे शेकडो ब्रोकर आहेत. यातील कोणतेही तुमच्या सोयीनुसार अॅप्लिकेशन मोबाईलमध्ये डाऊनलोड करायचं आणि त्यात तुम्ही तुमचे आधार कार्ड डिटेल, पॅन कार्ड डिटेल आणि सध्या तुम्ही वापरत असलेल्या बँक खात्याचे डिटेल्स (खाते क्रमांक आणि रद्द केलेला चेक) द्यायचे.
या व्यतिरिक्त तुम्ही जो ब्रोकर निवडता त्याची फी काही प्रमाणात असते. ती तुम्हाला द्यावी लागते खाते उघडताना. खाते उघडायला 2 ते 3 दिवसांची प्रक्रिया असते. पण तुम्हाला त्यासाठी कुठेही जावं लागत नाही. घरबसल्या ही प्रक्रिया पार पडते. एकदा का खाते उघडले की तुम्ही गुंतवणूक करायला मोकळे.
सेन्सेक्स म्हणजे काय?
तुम्ही सेन्सेक्स पडला सेन्सेक्स वधारला असे शब्द रोज ऐकत असाल, पण आता सेन्सेक्स म्हणजे काय? सेन्सेक्स म्हणजे बॉम्बे स्टॉक एक्सचेंजचा इंडेक्स. आणि या इंडेक्समध्ये म्हणजेच बॉम्ब स्टॉक एक्सचेंजमध्ये पाच हजारहून अधिक कंपन्या लिस्टेड आहेत. पण यातील निवडक 30 कंपन्यांनी सेन्सेक्स बनलेला असतो. आता या निवडक 30 कंपन्या म्हणजे नक्की कोणत्या? यात प्रत्येक सेक्टरच्या म्हणजे ऑटो, फार्मा, टेक्सटाईल, एफएमसीजी अशा प्रत्येक सेक्टरमधील टॉपची कंपनी आणि ज्यांचं मार्केट कॅपिटल मोठं आहे अशा कंपन्या असतात.
मग आता प्रश्न पडला असेल तुम्हाला निफ्टी 50 मध्ये कोणत्या कंपन्या असतात
निफ्टी 50 म्हणजे काय?
निफ्टी 50 म्हणजे नॅशनल स्टॉक एक्सचेंज, आता याचा इंडेक्सला निफ्टी 50 म्हणतात. यात 1600 कंपन्या लिस्टेड आहेत, ज्यातील टॉपच्या 50 कंपन्या निफ्टी 50 मध्ये येतात. आणि यातही प्रत्येक सेक्टरनुसार इंडेक्स असतात. म्हणजेच जसं सेन्सेक्स, निफ्टी 50 असतो. तसंच बँकेचा बँक निफ्टी, ऑटो सेक्टरचा ऑटो निफ्टी, आयटी सेक्टरचा आयटी निफ्टी, फार्मा सेक्टरचा फार्मा निफ्टी अशाप्रकारे प्रत्येक सेक्टरचा इंडेक्स असतो.
शेअर मार्केट हा यापेक्षा आणखी विस्तृत आहे. जसं आपण एखाद्या कंपनीच्या शेअर बाजारात गुंतवणूक करतो तसंच निफ्टी 50, बँक निफ्टी या इंडेक्समध्ये देखील गुंतवणूक करता येते. ती कशी पुढील भागात पाहुया.
महत्त्वाच्या बातम्या :
महत्त्वाच्या बातम्या
