SEBI on Digital Gold : डिजीटल गोल्डमध्ये गुंतवणूक करणाऱ्यांचं होऊ शकतं नुकसान, सेबीकडून सावधानतेचा इशारा जारी...
Digital Gold : सेबीचे चेअरमन तुहिन कांत पांडे यांनी डिजीटल गोल्डमध्ये गुंतवणूक करणाऱ्यांना सावध केलं आहे. डिजीटल गोल्डमध्ये गुंतवणूक करणाऱ्यापूर्वी सावधानता बाळगली पाहिजे, असं त्यांनी म्हटलं.
Digital Gold नवी दिल्ली : सिक्यूरिटीज अँड एक्सचेंज बोर्ड ऑफ इंडिया म्हणजेच सेबीचे चेअरमन तुहिन कांत पांडे यांनी डिजीटल गोल्डमध्ये गुंतवणूक करणाऱ्यांना सावध केलं आहे. सेबीनं स्पष्ट केलं की डिजीटल गोल्डला सिक्यूरिटी मानलं जात नाही किंवा कमोडिटी डेरिवेटिव्सच्या अंतर्गत देखील ते येत नाही.
SEBI on Digital Gold : डिजीटल गोल्डमध्ये गुंतवणूक करणाऱ्यांना सेबीचा इशारा
सेबीच्या मते जर एखाद्या प्लॅटफॉर्मकडून रक्कम थकली तर अशा स्थितीत सेबीकडे गुंतवणूकदारांना सुरक्षित ठेवण्याचं कोणतंही साधन नाही. सेबीनं डिजीटल गोल्डमध्ये गुंतवणूक करणाऱ्यांनी पूर्णपणे सावध राहावं, असं म्हटलं आहे.
सेबीचे चेअरमन तुहिन कांत पांडे यांनी नॅशनल कॉन्क्लेव ऑन REITs अँड InvITs–2025 मध्ये याबाबत माहिती दिली. डिजीटल गोल्ड इंडस्ट्रीचं नियमन सेबीकडून केलं जात नाही. मात्र, यासंदर्भातील मागणी दीर्घ काळापासून केली जात आहे. तुहिन कांत पांडे यांनी गुंतवणूकदारांना म्हटलं की डिजीटल गोल्डमध्ये गुंतवणूक करताना प्लॅटफॉर्म आणि त्याच्या अटींची पूर्ण माहिती घेणं आवश्यक आहे.
सेबी सध्या गोल्ड ईटीएफ आणि ट्रेडेबल गोल्ड सिक्यूरिटीजमध्ये केलेल्या सोन्यातील गुंतवणुकीचं नियमन करते. या दोन्हीतील गुंतवणूक सेबीच्या कक्षेत येते.
डिजीटल गोल्ड म्हणजे काय?
डिजीटल गोल्डची खरेदी पारंपरिक सोन्याप्रमाणं होत नाही. हा व्यवहार पूर्णपणे डिजीटल असतो. भारतात पेटीएम, फोन पे, गुगल पे गुंतवणूकदारांना डिजीटल गोल्डमध्ये गुंतवणूक करण्याची सुविधा देतात. 2021 मध्ये डिजीटल गोल्ड मार्केट 5000 कोटी रुपयांचं होतं. ते आता वाढून 13800 कोटी रुपयांवर पोहोचलं आहे.
दरम्यान, सेबीनं डिजीटल गोल्डमध्ये गुंतवणूक करणाऱ्यांना सावधानतेचा इशारा दिला असला तरी प्रत्यक्ष सोन्यात ज्यांनी गुंतणूक केली त्यांना चांगला परतावा मिळालेला आहे. सोने आणि चांदीत गुंतवणूक करणाऱ्यांना 2025 मध्ये चांगला परतावा मिळाला आहे. कारण, 31 डिसेंबर 2024 ला 24 कॅरेट सोन्याचा दर 75000 रुपयांदरम्यान होता. सध्या सोनं 1 लाख 22 हजारांवर पोहोचला आहे. त्यामुळं सोन्यात गुंतवणूक करणाऱ्यांना चांगला परतावा मिळाला आहे. तर, चांदीमध्ये गुंतवणूक करणाऱ्यांना देखील चांगला परतावा मिळाला आहे. चांदीचे दर 1 लाख 50 हजारांच्या पुढं पोहोचले आहेत.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
महत्त्वाच्या बातम्या
