भाजपचा विजय झाल्यास पेट्रोलचे दर होणार कमी, 'या' केंद्रीय मंत्र्यानं व्यक्त केला विश्वास

पाच राज्यांच्या विधानसभा निवडणुका (Assembly elections) होत आहेत. या पार्श्वभूमीवर भाजपकडून विविध आश्वासने दिली जात आहेत.

Petrol prices

Source : ABP Live

Petrol Price : देशात सध्या पाच राज्यांच्या विधानसभा निवडणुका (Assembly elections) होत आहेत. यामध्ये राजस्थान, छत्तीसगड, मध्य प्रदेश, तेलंगणा आणि मिझोरम या पाच राज्यांसाठी विधानसभेची निवडणूक होत आहे. या पार्श्वभूमीवर मतदारांना खुश करण्यासाठी भाजप वेगवेगळी आश्वासनं देत आहे. 25 नोव्हेंबर रोजी राजस्थानमध्ये होणाऱ्या विधानसभा निवडणुकीत भाजपने जर विजय मिळवला तर पेट्रोलचे दर (Petrol prices) कमी होऊ शकतात, असे वक्तव्य केंद्रीय पेट्रोलियम मंत्री हरदीप सिंग पुरी यांनी केलं आहे. राजस्थानमध्ये पेट्रोल किमान 11.80 रुपयांनी स्वस्त होण्याची शक्यता त्यांनी व्यक्त केली आहे. 

गेल्या अनेक दिवसांपासून पेट्रोलच्या दरात कोणतीही कपात झालेली नाही. अशा परिस्थितीत केंद्रीय मंत्री हरदीप सिंह पुरी यांच्याकडून मोठी माहिती समोर येत आहे. 25 नोव्हेंबर रोजी होणाऱ्या विधानसभा निवडणुकीत भाजपने विजय मिळवला तर राजस्थानमध्ये पेट्रोलचे दर कमी होऊ शकतात, असे हरदीप सिंग पुरी यांनी म्हटले आहे. जयपूरमध्ये एका निवडणूक कार्यक्रमाला संबोधित करताना केंद्रीय पेट्रोलियम मंत्री म्हणाले की, राजस्थानमध्ये भाजपची सत्ता आल्यास राज्यात काय बदल घडेल, असा प्रश्न मला विचारला जात आहे. सर्व प्रथम, माझा विश्वास आहे की भाजप पुढे आहे. सरकार स्थापन करण्याचा निर्धार आहे. आम्ही सत्तेत आल्यानंतर राजस्थानमध्ये पेट्रोलच्या किंमती देशाच्या इतर भागांच्या बरोबरीने आणण्याचे काम करू. राजस्थानमध्ये पेट्रोल स्वस्त होईल, आम्ही निवडून आलो तर ते किमान 11.80 रुपयांनी स्वस्त होईल असे सिंह म्हणाले. 

राजस्थानमध्ये पेट्रोल सर्वात महाग का?

राज्यातील काँग्रेस सरकारने लागू केलेल्या अतिरिक्त सेसमुळं राजस्थानमध्ये पेट्रोलची किंमत देशात सर्वाधिक आहे, असा आरोप पुरी यांनी केला आहे. राजस्थानमधील काँग्रेस सरकारनं गेल्या काही वर्षांत पेट्रोल आणि डिझेलवरील अतिरिक्त शुल्कातून 35,975 कोटी रुपये जमा केले आहेत. गेल्या दोन वर्षांत, राजस्थान सरकारने नोव्हेंबर 2021-2022 आणि 2022-2023 पर्यंत पेट्रोल आणि डिझेलवरील अतिरिक्त उपकरातून 35,975 कोटी रुपयांचा कर गोळा केला आहे. 

18 राज्यांचे 32,597 कोटी रुपये कर संकलन

दिल्ली, उत्तराखंड, नागालँड, लक्षद्वीप, मणिपूर, लडाख, दमण आणि दीव, जम्मू आणि काश्मीरसह या 18 राज्ये आणि केंद्रशासित प्रदेशांचे कर संकलन 32,597 कोटी रुपये असल्याचे पुरी यांनी प्रसिद्धीपत्रकात नमूद केले आहे.

संपूर्ण देशात पेट्रोलचा सरासरी दर 96.72 रुपये आहे.

आज संपूर्ण देशात पेट्रोलचा सरासरी दर 96.72 रुपये प्रति लिटर आहे. परंतु राजस्थानच्या गंगानगरमध्ये पेट्रोलचा सध्याचा दर 113.34 रुपये प्रति लिटर आहे. केंद्र सरकार पेट्रोल आणि डिझेलवर जास्त कर लादत असल्याच्या मुख्यमंत्री अशोक गेहलोत यांच्या विधानावर प्रत्युत्तर देताना मंत्री हरदीप सिंग पुरी म्हणाले की, त्यांनी प्रथम आपल्या राज्याच्या कारभाराकडे लक्ष द्यावे.

3 डिसेंबर रोजी मतमोजणी होणार 

राजस्थान विधानसभा निवडणुकीनंतर 3 डिसेंबरला मतमोजणी होणार आहे. 2018 च्या विधानसभा निवडणुकीत काँग्रेसने 99 जागा जिंकल्या होत्या. 200 सदस्यांच्या सभागृहात भाजपने 73 जागा जिंकल्या होत्या. अखेर गेहलोत यांनी बसपा आमदार आणि अपक्ष आमदारांच्या पाठिंब्याने मुख्यमंत्रीपदाची शपथ घेतली होती.

महत्त्वाच्या बातम्या: